Pas Maurco Icardi-t, skuadra e Galatasaray-t pritet të bëjë tjetër “Pazar” te Paris Saint-Germain.
Sipas asaj që shkruan “Tuttomercatoweb”, gjigandi turk është afër transferimit të mesfushorit portugez, Renato Sanches.
25-vjeçari pritet të transferohet në Stamboll në formulën e huazimit të thjeshtë njëvjeçar.
Largimi i tij nga “Parc des Princes” do të bëhet për shkak se Sanches nuk ka pasur hapësira të mjaftueshme në këtë sezon me PSG-në.
Që prej se u transferua në verën e kaluar nga Lille, reprezentuesi i Portugalisë ka zhvilluar 24 ndeshje në të gjitha garat me fanellën e Parisit (shumicën nga banka rezervë, apo në total 772 minuta), prej të cilave ka shënuar edhe dy gola.
Pra, larg pritshmërive nga performancat që kishte me Lille-n, para se të bashkohej me PSG-në si transfer i lirë.
Vlen të theksohet se ai ishte shumë afër që të bashkohej me Milan-in në atë kohë, madje palët patën edhe një lloj marrëveshje, por në fund ai vendosi që ta vazhdonte karrierën në PSG.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
