Suplementet e vitaminave: A na duhen dhe a janë të rrezikshme?

Suplementet e vitaminave shpesh reklamohen si një mjet për të forcuar sistemin imunitar ose kockat, dhe ndonjëherë edhe si një mbrojtje kundër COVID-19 ose për trajtimin e kancerit, por ekspertët paralajmërojnë se përdorimi i tyre nuk është vetëm humbje parash, por edhe potencialisht i rrezikshëm.

Studimet e tregut tregojnë se shitjet e tyre u rritën gjatë pandemisë së Coronavirusit.

Një e treta e popullsisë gjermane, për shembull, merr vitamina si shtesa dietike të paktën një herë në javë, sipas një studimi përfaqësues nga Instituti Federal Gjerman për Vlerësimin e Rrezikut (BfR). Çdo i gjashti gjerman merr tableta ose pluhur vitaminash çdo ditë.

Të dhënat e fundit nga Anketa Kombëtare e Shëndetit dhe Ushqyerjes në Shtetet e Bashkuara tregon se në mesin e të rriturve mbi moshën 20 vjeç, 57.6 për qind, kanë përdorur një shtesë diete në 30 ditët e fundit dhe se përdorimi është rritur me kalimin e viteve.

Suplementet dietike më të zakonshme të përdorura nga të gjitha moshat janë preparatet multivitamino-minerale.

Presidenti i BfR, Andreas Hensel, po përpiqet t’i kthjellojë adhuruesit e vitaminave: “një dietë e ekuilibruar dhe e larmishme i siguron trupit tuaj sasi të mjaftueshme të pothuajse të gjitha vitaminave”.

“Shumica e njerëzve nuk kanë nevojë për suplemente vitaminash. Nëse merrni doza të larta vitaminash në mënyrë të panevojshme, rrezikoni një mbidozë me efekte anësore”.

Një mbidozë në rastin më të mirë do të rezultojë që trupi juaj të prodhojë “urinë të shtrenjtë”, thotë Wiebke Franz, një nutricioniste në një qendër këshillimi për konsumatorët në shtetin gjerman të Hesse, dhe në rastin më të keq do të dëmtoni shëndetin tuaj.

Suplementet dietike, duke përfshirë vitaminat, nuk u nënshtrohen testeve të cilësisë dhe sigurisë si ilaçe, vëren ajo. Rrjedhimisht, nuk është e pazakontë që tabletat dhe pluhurat e vitaminave të përmbajnë papastërti.

Beta karoteni, një pararendës i vitaminës A, mund të rrisë rrezikun e kancerit të mushkërive te duhanpirësit, paralajmëron Franz, dhe një mbidozë e vitaminës A nuk është “e sigurt”. Shumë vitaminë D mund të shkaktojë dhimbje koke, të përziera dhe kalcifikim të veshkave, dhe marrja e dozave shumë të larta të vitaminës C për një kohë të gjatë mund të çojë në gurë në fshikëz dhe në veshka.

Një mbidozë e vitaminave ndonjëherë kalon pa u vënë re, sepse njerëzit që marrin pilula gjithashtu marrin vitamina në mënyrë natyrale me ushqim.

Nuk ka kufij të caktuar të sigurt për marrjen e vitaminave, gjë që avokatët e konsumatorëve e kanë kritikuar për vite me rradhë.

“Mungesat e vitaminave nuk janë problem në Gjermani. Shumica dërrmuese e njerëzve në këtë vend kanë mungesë të vitaminave”, pohon Shoqata Gjermane e të Ushqyerit (DGE).

Suplementet e vitaminave rekomandohen vetëm për disa segmente të popullsisë, për shembull gratë shtatzëna, kimioterapistët, të moshuarit dhe veganët e rreptë.

Megjithatë, shitja e suplementeve të vitaminave po lulëzon.

Vetëm farmacitë gjermane shitën rreth 2.3 miliardë euro suplemente dietike në vitin 2020, më shumë se gjysma e të cilave ishin vitamina dhe minerale, sipas degës gjermane të IQVIA, një firmë konsulente për kërkimin e tregut dhe farmaceutikën në SHBA.

Shitjet e vitaminave dhe mineraleve u rritën me 11 për qind krahasuar me vitin 2019. Imunostimulantët shënuan rritjen më të madhe – deri në 12 për qind, dhe rritje dyshifrore u regjistrua nga kombinimet e vitaminave A dhe D, si dhe kombinimet që përfshijnë vitaminën C.

Reklamimi i paligjshëm shpesh promovohet nga influencues që marrin një komision për prezantimin ose rishitjen e produkteve. Shumë kompani janë të vendosura në vende të tjera, dhe faqet e tyre të internetit shpesh nuk ofrojnë informacione për kompaninë dhe shfaqen vetëm përkohësisht, gjë që mund të cilësohet si një problem i madh i zbatimit të ligjit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.