“Skuqet” finalja argjentinase me 10 kartonë të kuq

Gjyqtari i Kupës së Botës Facundo Tello dha 10 kartonë të kuq në finalen e Trofeut të Kampionëve të Argjentinës mes Boca Juniors dhe Racing Club.

Kjo, pasi mesfushori i Racing Club, Carlos Alcaraz shkaktoi një përleshje para tifozëve të Boca Juniors me festimin e golit të tij fitues.

Me barazimin e skuadrave 1-1 në minutat e fundit të kohës shtesë, Alcaraz drejtoi një goditje me kokë në cepin e rrjetës për t’i dhënë fitoren Racing Club.

Megjithatë, festimi i tij i zgjatur para tifozëve kundërshtarë i tërboi lojtarët e Boca-s, duke e kapur nga veshi dhe duke i hedhur një top.

Tello, i cili do të jetë një nga gjyqtarët në Kupën e Botës në Katar, përjashtoi Alcaraz-in dhe u dha pesë kartonë të kuq lojtarëve të Boca-s pas përleshjeve.

Gjithsej, shtatë kartonë të kuq iu dhanë lojtarëve të Boca-s dhe tre nga Racing gjatë ndeshjes.

Norberto Briasco shënoi i pari për Boca-n përpara se Matias Rojas i Racing ta barazonte në pjesën e parë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.