Shuhet në moshën 89-vjeçare “Mjeshtri i Madh”, Lutfi Hoxha

Aktori Lutfi Hoxha, i nderuar me titullin “Mjeshtri i Madh”, është ndarë nga jeta në moshën 89-vjeçare.

Lajmi u bë i ditur nga teatri “Aleksandër Moisiu”, duke cituar mesazhin ngushëllues.

“Qofsh i dritës engjëll i mirë e i bardhë. Lutfi Hoxha e jetoi këtë jetë në skenë, aty ku dha gjithçka”, shkruhet në mesazhin e Teatrit.

Për shumë dashamirës të filmit shqiptar, Hoxha është babai i Tilit në filmin “Shoku ynë Tili” ndërsa mes aktorëve të Durrësit ai njihej si ‘Luti’.

Mbi 100 role në teatër dhe afro 17 në kinematografi përbëjnë gamën e jetës së tij artistike.

Disa prej filmave në të cilat ka interpretuar janë “Rrugicat që kërkonin diell”, “Detyrë e posaçme”, “Thirrja”, ”Shoku ynë Tili”, “Pylli i lirisë”, “Tinguj lufte”, “Nata e parë e lirisë”, “Ne dhe Lenini” etj.

Dalja në pension nuk i solli apati profesionale, përkundrazi.

Vijoi t’i përgjigjet ftesave të regjisorëve.

Luajti në “Qytet pa dashuri” të Bashkim Hoxhës, “Trokitje në dyert e dhimbjes” nga Serafin Fanku, monologun e Edipit në “Edipi Mbret”, “Nuk paguajmë, nuk paguajmë” të nobelistit Dario Fo, në komedinë “Dy vëllezër e gjysmë”, si dhe në Teatrin Kombëtar me “Korbi i bardhë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.