“Shtëpia e Lirisë”, ritakim bashkues – konjukturë e re!

“Kam gjetur mekanizimin si do i fitojmë zgjedhjet 6 marsit dhe shoh grintë optimizmi në fitore”.

Kjo do të ishte deklarata e ish-kryeministrit të Shqipërisë, Sali Berisha, në rikthimin e tij në Kuvend, katër muaj pas përjashtimit nga Grupi Parlamentar i Partisë Demokratike, nga dishepulli i tij politik, Lulzim Basha.

Ky akt i fundëm, do të sillte edhe kthesën e Berishës, me ndarjen e demokratëve në dy fraksione – pro-Basha dhe pro-Berisha.

Ish-kreu i demokratëve, nisi aksionin opozitar kundër opozitës së Bashës, duke thirrur një Kuvend Kombëtar, të mbledhur nga anëtarësia e pretenduar demokrate, ku u krijua dhe Komisioni i Rithemelimit.

Teksa më 30 janar, gjashtë emra kandidatësh për zgjedhjet e pjesshme lokale i prodhoi pa probleme të mëdha, vetëm një ditë më pas – në pamundësi kohore për t’u regjistruar si subjekt (edhe për shkak të afateve të ngushtuara) – ai njoftoi koalicionin “Shtëpia e Lirisë”, nën një çati me Lëvizjen Socialiste për Integrim dhe këdo parti opozitare që donte t’u bashkohej.

Koalicioni i 2009-ës PD-LSI, do të risillej në jetë me Berishën jashtë PD-së dhe Metën fizikisht në presidencë, por me mendje e zemër në krah të Berishës.

Vula e LSI-së, por emrat të Berishës

Për Albanian Post, drejtuesi i mandatuar i Komisionit të Rithemelimit, Belind Këlliçi, ka deklaruar se Partia Demokratike (e përfaqësuar nga Komisioni i Rithemelimit) është forca drejtuese politike e koalicionit.

Kjo, pavarësisht se nuk është e regjistruar zyrtarisht si forcë politike dhe Komisioni Qendror i Zgjedhjeve, nuk e njeh.

“Partitë e tjera opozitare do të mbështesin kandidatët, të cilët rezultuan fitues në primaret e mbajtura më 30 janar”, theksoi ai sa i përket mënyrës se si do të shfaqen në zgjedhjet e 6 marsit.

Më tej, ai shtoi se koalicioni opozitar i kurorëzuar, do të mbështesë kandidatët demokratë që fituan besimin e anëtarësisë së PD-së.

“LSI-ja dhe forcat e tjera opozitare, njohin Komisionin e Rithemelimit si të vetmin autoritet drejtues në PD, e për rrjedhim edhe legjitimitetin e kandidatëve tanë”, citoi ai.

Logoja ose sigla nën të cilën ata shfaqen, është një tjetër problem në këtë çështje, pasi duhet parë nëse do të njihej koalicioni nga KQZ-ja.

Sa i përket asaj, Këlliçi për AP-në tha se simbolizon të gjitha sakrificat e popullit opozitar.

Nën emrin “Shtëpia e Lirisë”, logo-ja e koalicionit do të jetë në formë rrethore, ku në gjysmën e sipërme shkruhet Shtëpia e Lirisë dhe në atë të poshtme është flamuri shqiptar.

Ndër të tjera, i pyetur se pse ky vendim për t’u bashkuar me LSI-në, Këlliçi tha se kjo ka ardhur pasi ajo përfaqëson zgjedhësit e majtë të cilët nuk besojnë se Rama është socialist. Pavarësisht se “rithemeluesit” kanë një mision ndaj Bashës, ata nuk e kanë ulur as retorikën kundër kryeministrit.

“Ju pëlqen apo jo, mijëra qytetarë shqiptarë e kanë votuar LSI-në për opozitarizmin e saj ndaj Ramës dhe rreshtimin disavjeçar me PD-në në opozitë”, ravijëzoi drejtuesi i Komisionit të Rithemelimit.

Sipas tij, jo vetëm LSI-ja ka bërë opozitarizmin por, “çdo forcë politike, e cila ngre zërin kundër bashkëqeverisjes Rama-Basha (siç e pretendojnë nga kampi Berisha, kundër padrejtësive ndaj qytetarëve dhe krimeve të pushtetit, është e mirëpritur të na bashkohet”.

Në përfundim, ai e përmbyll duke thënë se bashkimi i forcave opozitare, është jetik për vendin.

“Shtëpia e Lirisë është i vetmi koalicion opozitar në Shqipëri. Ishte e domosdoshme për demokracinë dhe pluralizmin, që Shqipëria të mos mbetej pa opozitë”.

E gjitha kjo, në të njëjtin rrafsh universal, ku kreu i njohur juridikisht i PD-së, Basha, pretendon të njëjtën gjë.

Ritakim bashkues – konjukturë e re

Kreu i Unionit të Gazetarëve, Aleksandër Çipa, për Albanian Post thotë se bashkimi me LSI-në është një miqësi e qëndrueshme dhe e sprovuar sidomos në kohë të vështira politike për secilin dhe bashkë.

“Karrierat politike të dy zotërinjve – Berisha-Meta – kanë pasur kryqëzime të çuditshme dhe takime të lexueshme, sikundër kanë qenë të ndryshme në të njëjtën udhëtim 30 vjeçar”, thekson Çipa.

Sipas këtij të fundit ky është një ritakim bashkues me një konjukturë të re, në pozita të njëjta, me nevojë të përbashkët dhe front kundërshtarësh sa simetrikë aq dhe asimetrikë.

“Të dy bashkëluftëtarët bëhen bashkëfamiljarë politikë, në fatin ekzistencial të tyre, duke vënë në dispozicion të njëri-tjetrit, për herë të parë me besim të verbër, gjithë arsenalin politik dhe jo politik, dhe asetet që posedojnë”, vijon Çipa.

Për Aleksanër Çipën bashkimi Berishë-Metë do ta dobësojë lëvizjen e re të PD-së.

Por, sipas tij PD-ja që mbetet, ka shanset që të fitojë mundësinë e madhe që të shndërrohet në e vetmja forcë që tejkalon modelin tranzicionist të partitokracisë së tre dekadave që u dominua nga dy të bashkuarit rishtazi.

“Përballja e Bashës me Berishën dhe Metën kalon në një kapitull tjetër edhe më kompleks, edhe më pengues” thotë Çipa për AP-në.

Nga ana tjetër i pyetur se çfarë do të thotë kjo për të ardhmen e demokracisë, Çipa i referohet koalicionit të kurorëzuar “Shtëpia e Lirisë”.

“Rikompozimi i faktorëve partiakë në skenën politike të vendit pas ‘Shtëpisë së Lirisë’ që realizohet për provë të parë tek ‘shtëpia politike e Metës’, është një risi demonopolizimi në skenën e vendimmarrjeve politike të 10 vjeteshin të fundit”, ravijëzon ai.

Ai e përmbyll pikëpamjen se po krijohet një skemë e re forcash për pluripartizmin aktual në vend dhe rikthen përballje jo monotone.

“Sikundër mund të thuhet se po shfaqen edhe premisa për rikthimin e konfliktit politik të njohur sidomos në pikun e tranzicionit që kryesohej nga zoti Berisha, Meta dhe kundërshtari i dikurshëm i tyre, Fatos Nano”.

Zgjedhje lokale – Peshë kombëtare

Gazetari dhe analisti i njohur Mentor Kikia, mendon se zgjedhjet e 6 marsit, përveç impaktit lokal, do të kenë edhe atë kombëtar. Kjo, pasi do të tregojnë se nga do të anojë peshorja e opozitës.

Sipas tij, do të mësohet se cila nga dy copat e PD-së është më e madhe dhe cila do të jetë opozita e zgjedhjeve të ardhshme të përgjithshme.

“Tashmë, pas katër muajsh, sado që dy palët refuzojnë ta artikulojnë, PD-ja është zyrtarisht e ndarë në dy pjesë dhe lufta është se cila pjesë është më e madhe dhe cila është PD-ja e vërtetë. Njëra ka vulën dhe tjetra pretendon se ka shumicën e anëtarësisë”, thekson Kikia.

Në pikëpamjen e tij, analisti artikulon se më 6 mars, është rasti për ta numëruar votën edhe për llogari të sherrit të madh mes demokratëve.

Kjo garë në këndvështrimin e tij, do të jetë sërish me tri palë. Pra, do të ketë sërish një trekëndësh politik.

Por, ai nuk do të jetë më trinomi tradicional PS, PD dhe LSI, ku kjo e fundit kalonte një herë me njërën palë e një herë me tjetrën. Ky do të jetë një trinom ku do të kemi PS-në e plotë, PD-në e Bashës dhe PD-në e Berishës plus LSI-në.

Kikia e përmbyll përsiatjen e tij me një pikëpamje lineare mbi dyshen Meta-Berisha.

“Sido të dalë rezultati, dyshja Berisha-Meta, do të vijojnë të ecin bashkë”, formëson ai. “Të paktën, edhe në zgjedhjet e ardhshme të përgjithshme, duke mbetur si një kënd i trekëndëshit të politikës shqiptare”.

Megjithatë, edhe pse këndet janë tre, brinjët janë katër dhe të bashkuar në një, janë dy më jetëgjatët në politikën shqiptare.

Kryeministrinë e kanë kaluar të dy. Presidencën po ashtu. Aq më tepër, të qenit në opozitë.

Por në opozitë bashkë si këtë herë, kaq të njehsuar, nën të njëjtën çati, kurrë!

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com