Presidentja e Kosovës, Vjosa Osmani-Sadriu, uroi të enjten presidenten e re të zgjedhur të Maqedonisë së Veriut, Gordana Silanovska-Davkova, por ndryshe nga liderët e tjerë rajonalë, kjo e fundit nuk tregoi respekt për presidenten kosovare, duke e veçuar nga pjesa tjetër e krerëve shtetëror.
Kandidatja e VMRO-DPMNE fitoi zgjedhjet presidenciale kundër presidentit të deritanishëm, Stevo Pendarovski, duke u bërë gruaja e parë që zgjidhet presidente në Maqedoninë e Veriut. Një dyzinë liderësh uruan presidenten e zgjedhur të Maqedonisë së Veriut, përfshirë presidenten Osmani.
Megjithatë, ndonëse presidentja Osmani zgjodhi fjalët më të mira për Silanovska-Davkovën, duke dërguar një mesazh të qartë se qëndron për marrëdhënie të mira fqinjësore, pavarësisht retorikës agresive të presidentes maqedonase ndaj shqiptarëve, kjo e fundit e përçmoi duke mos ia theksuar as pozitën që mban e as shtetin që përfaqëson, ndryshe nga të tjerët.
“E nderuar Vjosa, më gëzoi urimi Juaj i sinqertë. Jam e lumtur për faktin që gratë në rajonin tonë po bëjnë histori politike, duke qëndruar guximshëm në pozita kyçe. Uroj të vazhdojmë bashkëpunimin tonë edhe në të ardhmen, për të arritur përfundimisht objektivin kryesor strategjik, integrimin evropian të të gjithë rajonit”, shkroi të enjten presidentja e re maqedonase.
Përderisa në mesazhet falënderuese të Silanovska-Davkovës në platformën “X” figurojnë flamujt e shteteve respektive dhe pozitat shtetërore të atyre që e uruan, në rastin e presidentes Osmani, ajo i referohet vetëm emrit të përveçëm të presidentes. Gjithashtu, flamuri i Kosovës mungon krahas flamujve tjerë në falënderimin e presidentes maqedonase për homologen kosovare.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
