Shqipëria del në mbrojtje të Izraelit pas raportit të COI-s

Shqipëria së bashku me një numër shtetesh anëtare të Kombeve të Bashkuara dolën në mbrojtje të Izrael-it, ndërsa një Komision Hetimor i OKB-së (COI) i paraqiti raportin e tij të dytë këtij organi.

Komisioni akuzoi Izraelin për shkelje të ligjit ndërkombëtar dhe i bëri thirrje Këshillit të Sigurimit të OKB-së t’i japë fund “okupimit të përhershëm” izraelit.

Disa shtete dënuan komisionin, i mandatuar për të hetuar të gjitha aspektet e konfliktit izraelito-palestinez që nga rrënjët e tij.

Shqipëria, Australia, Austria, Bullgaria, Kanadaja, Çekia, Gjermania, Guatemala, Italia, Liberia, Ishujt Marshall, Mikronezia, Holanda, Mbretëria e Bashkuar dhe Uruguai ishin ndër vendet që mbrojtën pozicionin e Izraelit.

Kjo, së bashku me Bashkimin Evropian, i cili nxori një deklaratë kundër COI-s.

Këshilli i OKB-së për të Drejtat e Njeriut në Gjenevë krijoi komisionin prej tre personash vitin e kaluar pas një konflikti 11-ditor midis Izraelit dhe grupeve terroriste në Gaza.

COI iu dha një mandat unik me afat të hapur. Ai është i ngarkuar për hetimin e çdo shkeljeje të të drejtave të njeriut izraelite brenda dhe jashtë territorit të saj sovran.

Ambasadori izraelit në OKB, Gilad Erdan, kritikoi strukturën e komisionit dhe emërimet e anëtarëve si dëshmi të mëtejshme të njëanshmërisë së pashpresë të Këshillit të të Drejtave të Njeriut kundër Izraelit.

Ndërtimi i ngjarjes

Në sesionin e 77-të të Asamblesë së Përgjithshme të OKB-së në New York, COI prezantoi raportin e saj të fundit.

Tre anëtarët e saj konfirmuan se raportet e ardhshme do të shqyrtonin aparteidin nga Izraeli.

Kjo, duke thënë se hetimi ishte fokusuar deri më tani në “shkaqet rrënjësore” të konfliktit izraelito-palestinez – të cilin ata ia atribuuan pranisë së Izraelit në Bregun Perëndimor.

Kryetarja e Komisionit dhe ish-shefi i OKB-së për të drejtat e njeriut, Navi Pillay, e quajti aparteidin “një manifestim të okupimit”.

“Izraeli nuk ka ndërmend t’i japë fund këtij okupimi, dhe kështu, nëse lihet pa adresuar nga komuniteti ndërkombëtar, ne kemi frikë se konflikti do të vazhdojë pafundësisht”, kërkoi ajo.

Në përgjigje, i dërguari i Izraelit në OKB Gilad Erdan dënoi raportin, duke e quajtur Pillay-n, ekipin e saj dhe raportin e tyre “antisemitist”.

“Komisionerët u zgjodhën pikërisht sepse ata e urrejnë shtetin hebre”, tha Erdan.

Izraeli refuzon të bashkëpunojë me komisionin dhe nuk do të lejojë hyrjen në shtet ose hyrjen në zonat e kontrolluara nga palestinezët në Bregun Perëndimor ose në Gaza.

Autoritetet hodhën poshtë raportin e javës së kaluar, me kryeministrin Yair Lapid që e quajti atë “të njëanshëm” dhe “nxitës”.

Shtetet e Bashkuara denoncuan gjithashtu raportin e së enjtes, duke akuzuar komisionin për “veçim të padrejtë të Izraelit”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.