Skuadra e Sevilla-s ka arritur të fitojë me shifrat 2-1 përballë kampionëve në fuqi të La Liga-s, Atletico Madrid-it.
Në ndeshjen e javës 18, të luajtur në “Ramon Sanchez Pizjuan”, vendasit fituan falë golit të shënuar dy minuta para përfundimit të kohës së rregullt të takimit.
Për vendasit kjo ishte fitorja e dytë radhazi në La Liga. Për miqtë humbja e dytë radhazi.
Goli i parë i takimit u shënua në minutën e shtatë nga mesfushori, Ivan Rakitic-i. Miqtë barazuan përkohësisht në minutën e 33. Goli i Felipe-s, i dërgoi skuadrat në dhomat e zhveshjes me rezultat të balancuar.
Në pjesën e dytë, ashtu si dhe në të parën, Atletico ishte më kërkuese në fushë, por pa mundur të konkretizojë aksionet. Në minutën e 88 do të vinte goli i fitores së vendasve.
Argjentinasi, Lucas Ocampos-i, e dërgon topin e dhuruar nga Jules Kounde, pas krahëve të portierit mik, Jan Oblak-ut.
Sevilla merr tri pikët që e mbajnë në vendin e dytë, por i shkurtojnë diferencën me Real Madrid-in e vendit të parë, me vetëm pesë pikë. 42 pikë ka Real-i, 37 Sevilla. Atletico renditet në vendin e pestë me 29 pikë.
Kujtojmë se të dy skuadrat kanë nga një ndeshje më pak. Aktualisht ato kanë luajtur 17 javë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
