Rritja e tarifave të ujit duket se ka nisur teksa vijon bashkimi i ujësjellësve për të krijuar ndërmarrje më të mëdha për të përmirësuar shërbimin.
Aplikimi i parë është bërë nga ujësjellësi i Vlorës, me miratimin e dhënë nga Enti Rregullator i Ujit (ERRU), ku tarifat e reja janë në rritje.
Çmimi i ujit për familjarët që do të shërbehen nga ujësjellës-kanalizime Vlorë nga muaji shkurt do të jetë 33.3 për qind më i lartë sesa aktualisht.
ERRU ka miratuar një tarifë 60 lekë/m3 ujë për këtë kategori nga 45 lekë/m3 që është aktualisht.
Tarifat e reja – për biznesin dhe klientët publikë që janë kryesisht institucionet – do të jenë 20 për qind më të larta.
Me tarifat e vjetra paguajnë 100 lek/m3, kurse me ato të miratuara së fundmi 120 lekë/m3.
Megjithatë, tarifat e reja janë më të ulëta sesa ato që kishte kërkuar ndërmarrja e Vlorës në aplikimin e saj.
Shërbimi i largimit të ujërave të ndotura ka pësuar gjithashtu rritje.
Tarifa e miratuar për familjarët për këtë rast është 17 lekë, me një rritje 13 për qind në raport me tarifën e mëparshme.
Ndërsa për biznesin dhe konsumatorët publikë tarifa e re është 28 lekë me një rritje 12 për qind nga ajo aktuale.
Po ashtu rritje kanë pësuar edhe tarifat fikse mujore për shërbimin duke u dyfishuar për konsumatorët familjarë nga 100 në 200 lekë në muaj.
Ndërsa për bizneset është rritur me më shumë se 2.5 herë.
Sakaq, Enti ka miratuar edhe objektivat kryesorë që i janë vendosur ndërmarrjes sa i takon mbulimit me shërbim të furnizimit me ujë, mbulimit me shërbim të kanalizimeve, uji pa të ardhura, norma e arkëtimit apo mbulimi i kostove.
Ndërmarrja e ujësjellësit të Vlorës bashkon tre ujësjellës që është ai i Vlorës, Selenicës dhe Himarës.
Por sipas njoftimit të publikuar në faqen e ERRU, ende nuk është bërë riorganizimi i plotë i shoqërisë. Përditësimi i fundit i faqes është në korrik 2023.
ERRU ka në shqyrtim edhe disa aplikime të tjera për ujësjellësit Durrës, Lezhë dhe Fier.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com