Rama: Kriza e jashtëzakonshme energjetike po vjen

Kryeministri i Shqipërisë, Edi Rama, të dielën e 3 tetorit, përmes një dalje publike, ka njoftuar se kriza e jashtëzakonshme e energjetikë do të përfshijë dhe vendin tonë.

Sipas Ramës, kjo krizë ka nisur të japë shenja nga Kina e Koreja e Jugut, në Amerikë, në Britaninë e Madhe dhe në hapësirën e Bashkimit Evropian, e deri në vendet fqinje, si Italia e Greqia.

“Temperatura e kësaj krize po rritet kudo, tanimë me orë jo me ditë, ndërkohë që ulja e temperaturave të motit, po afron bashkë me dimrin dhe me rritjen e natyrshme të nevojës edhe për ngrohje”, ka deklaruar Rama.

Sipas Ramës, kjo do të sjellë rritje “marramendëse” të çmimeve të gazit dhe karbonit dhe të çmimeve të naftës.

“Dukuria e rritjes marramendëse të çmimit të gazit e të karbonit në të gjitha tregjet ndërkombëtare, si edhe trendi i fortë i rritjes së çmimit të naftës, shoqëruar me një rritje të përgjithshme çmimesh të prodhimeve të konsumit të përditshëm, qëndrojnë sot para të gjitha vendeve”, vijoi Rama.

Ai ka shpjeguar se, energjia është “trefishuar” në Shqipëri.

Krahasuar me vitin e kaluar, “ritmet e larta të rimëkëmbjes” nga pandemia dhe “nevoja e tejrritur” për energji, e kanë rritur çmimin e gazit.

Çmimi u rrit me “rreth 250%”, atë  të karbonit me “rreth 80%”, ndërkohë që çmimi i naftës është rritur nga “rreth 60 dollarë” për fuçi në gusht të 2021, në “80 dollarë” në momentin që flasim.

“Sipas projeksioneve të sotme, çmimi mund të arrijë në 100 dollarë për fuçi deri në fund të vitit”.

Rama ka vijuar duke arsyetuar se, “kërkesën dhe ofertën për gaz e ka ndikuar ndryshimi i klimës”, ndërsa, prodhimi i energjisë nga burimet alternative është “zvogëluar”.

Në bursën HUPX, sipas kryeministrit, energjia elektrike është tregtuar me mesatarisht 39 euro/MWh vitin e shkuar. Ndërsa sivjet ky çmim ka arritur shifrën e 110 eur/MWh, duke shënuar një rritje prej 182%.

Kriza e gazit në Evropë – krizë e burimeve të rinovueshme

Çmimet evropiane të gazit natyror janë rritur aq shumë, saqë qindra miliona njerëz mund të përballen me shtëpi të ftohta ose fatura të fryra të energjisë gjatë dimrit.

Ekziston gjithashtu frika e një ndikimi të fuqishëm, pasi dyoksidi i karbonit i përdorur në prodhimin e ushqimit – një nënprodukt i plehut të bërë me gaz natyror – gjithashtu po shtrenjtohet.

Politikanët po fajësojnë rritjen e çmimeve në rritjen e kërkesës për gaz natyror, ndërsa bota zgjohet nga pandemia, ndërprerja e furnizimit e shkaktuar nga mirëmbajtja dhe një verë më pak erë se zakonisht. Kjo e fundit pa një rënie të energjisë së prodhuar nga era.

Por në të vërtetë, kriza e Evropës është në sektorin e saj të energjisë së rinovueshme. Rajoni ka investuar shumë në energjitë e rinovueshme, të tilla si era dhe dielli, por nuk mund të marrë mjaft nga kjo energji e gjelbër për njerëzit që kanë nevojë për të.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.