Kosova dhe Tajlanda synojnë të thellojnë dhe zgjerojnë edhe më shumë bashkëpunimin bilateral, derisa planifikojnë të miratojnë një skemë të përjashtimit nga kërkesa për pajisje me vizë për qytetarët e të dyja vendeve për të festuar 10 vjetorin e marrëdhënieve dypalëshe diplomatike.
Shefja e misionit diplomatik të Kosovës në Bangkok, Ulpiana Lama, në një prononcim për gazetën tajlandeze “Bangkok Times” të dielën, ka thënë se shënimi i 10-vjetorit të marrëdhënieve bilaterale është një rast i mirë për të çuar marrëdhëniet Kosovë-Tajlandë në një tjetër nivel.
“Të dyja vendet kanë marrëdhënie të shkëlqyera, por ne duam t’i afrojmë njerëzit më afër njëri-tjetrit. Ne po punojmë me autoritetet tajlandeze dhe agjencitë qeveritare për të përjashtuar të gjithë qytetarët nga kërkesa për vizë. Jemi në rrugën e duhur. Shpresojmë se shumë shpejt do të kemi lirinë e lëvizjes”, ka thënë diplomatja kosovare.
E pyetur për afatin kohor për lirimin e qytetarëve nga kërkesa për vizë, ajo ndër të tjera ka thënë se kjo është çështje procedurale, por procesi i tejkalimit të pengesave veçse ka filluar, derisa ka shprehur optimizmin se qytetarët e të dyja vendeve do të udhëtojnë të lirë brenda një viti.
Kosova dhe Tajlanda kanë nënshkruar marrëveshje për vendosjen e marrëdhënieve diplomatike në vitin 2013, pak kohë pas njohjes zyrtare nga ky shtet, derisa në vitin 2018 kanë nënshkruar një momerandum mirëkuptimi për heqjen e vizave për mbajtësit e pasaportave diplomatike.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
Lajmet kryesore
-
Kurti e di që dëmi i Zajednicës e eklipson çdo përfitim nga anëtarësimi në KiE
-
Azerbajxhani miraton heqjen e vizave me Shqipërinë
-
Osama Hamdane: Ne pranuam marrëveshjen e armëpushimit pa hequr dorë nga vijat tona të kuqe
-
Maqedonci kërkon që KFOR-i të qëndrojë në Kosovë derisa Serbia të demokratizohet
