Projekti Pegasus: Ministrat francezë në gjurmët e spyware

Telefoni i një ish-ministri francez tregoi gjurmë digjitale të aktivitetit me spyware të NSO Group, sipas analizës forensike të ndërmarrë nga hetimi i projektit Pegasus, shkruan “The Guardian”.

François de Rugy, i cili ka qenë i emëruar si ministër i Mjedisit, tha se ishte “i habitur” nga zbulimi.

Projekti Pegasus, sipas tij, ngre pyetje të reja në lidhje me përdorimin e spyware-ve nga klientët e NSO-së, një kompani izraelite e mbikëqyrjes.

Të dhënat e tij u shfaqën në një bazë të zbuluar, e cila gjithashtu përfshinte numrat celularë të presidentit francez Emmanuel Macron dhe shumicës së kabinetit të tij me 20 anëtarë, së bashku me kryeministrin e atëhershëm, Edouard Philippe.

Zyrtarë francezë dhe belg

Një zëdhënës i Grupit NSO tha që Macron dhe zyrtarë të tjerë të qeverisë franceze dhe belge në listë “nuk janë dhe nuk kanë qenë kurrë shënjestra të Pegasus-it”.

Kërkimet nga projekti Pegasus sugjerojnë se Maroku ishte vendi që mund të ketë qenë i interesuar për Macron-in dhe ekipin e tij të vjetër.

Kjo ngre shqetësimin se telefonat e tyre janë zgjedhur nga një prej aleatëve të ngushtë diplomatikë të Francës.

Analiza kriminalistike në telefonin e De Rugy u ndërmor nga Laboratori i Sigurisë së Amnesty International, një partner teknik në projektin Pegasus.

Ai tregoi gjurmët e një aktiviteti të lidhur me Pegasus-in në pajisje, por nuk kishte prova të një infeksioni të suksesshëm.

Një anëtar i laboratorit të Amnesty tha se studiuesit e saj kishin zbuluar “një adresë iMessage, të regjistruar në telefon, e cila ka qenë e lidhur me sulmet e mëparshme të Pegasus-it në telefonat francezë dhe marokenë”.

Ata shtuan se zbulimi “mund të jetë një hap paraprak në fazën e hershme të një infeksioni të mbetur në tentativë”.

De Rugy tha se ai e kishte raportuar çështjen te prokurori i shtetit francez.

“Hetimi i mediave u atribuon një rol shërbimeve të inteligjencës marokene në këtë operacion. Ky informacion më befason. Unë kam kërkuar një dëgjesë me ambasadorin maroken në Francë”, shtoi De Rugy.

Ai tha se rezervoi të drejtën për të ndërmarrë veprime të mëtejshme ligjore, nëse këshillohet ta bëjë këtë.

Charles Michel

Lista e rrjedhur gjithashtu përmban numra që i përkasin Charles Michel, ish-kryeministri i Belgjikës, i cili tani shërben si president i Këshillit Evropian, si dhe babait të Michel, Louis Michel, një ish-ministër i Jashtëm belg.

Shfaqja e një numri në listën e rrjedhur – që përfshin numra të zgjedhur nga qeveritë që janë klientë të NSO Group, firmës izraelite të spiunëve – nuk do të thotë se ai ishte subjekt i një sulmi të përpjekur ose të suksesshëm.

NSO-ja këmbëngul se baza e të dhënave nuk ka “asnjë rëndësi” për kompaninë. Kompania tha se mund të jetë pjesë e një liste më të madhe numrash që mund të jenë përdorur nga klientët e NSO Group “për qëllime të tjera”.

Maroku tha në një deklaratë se “kategorikisht i hedh poshtë dhe i dënon këto akuza të pabazuara dhe false”, duke shtuar se ishte “e gabuar” dhe “false” të thuhej se vendi kishte depërtuar në telefonat e figurave publike kombëtare ose të huaja.

“Qeveria e mbretërisë së Marokut kurrë nuk ka blerë software kompjuterike për t’u infiltruar në pajisjet e komunikimit dhe as autoritetet marokene nuk kanë kryer ndonjëherë veprime të tilla”, thuhej në deklaratë.

Charles Michel ka qenë i vetëdijshëm për kërcënimet dhe u morën masa për të kufizuar rreziqet.

Louis Michel ishte një anëtar i parlamentit Evropian dhe bashkë-president i Bashkimit Evropian dhe Asamblesë së Parlamentit të Paqësorit të Karaibeve kur numri i tij u shfaq në të dhënat e fillim-vitit 2019.

Ai ka kontakte të ngushta me disa krerë të shteteve afrikane.

I pyetur nga “The Guardian”, Louis Michel u shpreh se ishte i befasuar dhe i shqetësuar nga ai informacion.

“Unë kurrë nuk mund ta imagjinoja që teknologjitë e reja mund të ishin kaq ndërhyrëse dhe jashtëzakonisht të rrezikshme për funksionimin normal të demokracisë. Jam i lumtur që jam bërë i vetëdijshëm”, përfundoi ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.