Përkeqësohet hendeku gjinor në Shqipëri – bie me 6 vende – sipas raportit global

Në vendin e 23-të në botë renditet Shqipëria sipas Indeksit të Hendekut Gjinor të vitit 2024, publikuar nga Forumi Ekonomik Global.

Vendi ynë – krahasuar me një vit më parë – ka rënë me gjashtë vende, por përsëri qëndron mbi vendet e rajonit, Serbisë (26), Maqedonisë së Veriut (58), Malit të Zi (67).

Lidhur me treguesit në arritjet në arsim, Shqipëria ka pësuar një përkeqësim të thellë. Ka zbritur në vendin e 116-të nga vendi i 33-të të një viti më parë.

Po ashtu fuqizimi politik, nga vendi i 28-të në vitin 2023 në vendin e 30-të.

Ndërkohë, përmirësim ka shënuar në treguesit për shëndetin dhe mbijetesën, në vendin e 128-të, një përmirësim me pesë vende.

Gjithashtu edhe në treguesin pjesëmarrja dhe mundësitë ekonomike, në vendin e 16-të nga i 18-ti një vit më parë.

Sa i përket hendekut gjinor në Evropë, Shqipëria renditet në vendin e 16-të, duke lënë pas edhe vende të zhvilluara si Italia dhe Austria.

Islanda vijon të mbajë vendin e parë në botë për të 15-in vit me radhë për hendekun më të ulët gjinor mes femrave dhe meshkujve, me 90.8 për qind, e ndjekur nga Finlanda, Norvegjia, Suedia, Gjermania dhe Irlanda.

“Në vitin 2024, Evropa ka nivelin më të lartë të barazisë politike nga të gjitha rajonet. Tetë ekonomi në rajon tregojnë barazi në nivel ministror: Norvegjia, Shqipëria, Belgjika, Spanja, Finlanda, Islanda, Holanda dhe Portugalia. Barazia në parlamente ndryshon ndjeshëm, me 16.7% të hendekut gjinor të mbyllur në Qipro dhe 90.8% në Islandë”.

Evropa renditet e para në renditjen rajonale të vitit 2024, duke mbyllur tre të katërtat e hendekut të saj gjinor (75%).

Rezultati i përgjithshëm i barazisë së Evropës është përmirësuar me 6.2 pikë përqindje që nga viti 2006.

Sipas Forumit Ekonomik Botëror, viti zgjedhor 2024 paraqet një mundësi unike për të bërë përparim në mbylljen e hendekut global gjinor.

“Pabarazia gjinore në mbarë botën është ngushtuar pak gjatë vitit të kaluar, por me një ritëm më të ngadaltë se më parë. Tani vlerësohet se do të duhen 134 vjet – ose pesë breza – për të mbyllur hendekun global gjinor, nga 131 vjet në 2023”, sipas WEF.

Cikli gjithëpërfshirës zgjedhor i këtij viti mund ta ngushtojë atë hendek, megjithatë, duke rritur përfaqësimin e grave në sferën politike, tha organizata joqeveritare.

“Kur kaq shumë njerëz shkojnë në votime në mbarë botën, dhe ka kaq shumë ndryshime në sistemet politike, ka një mundësi këtu për të ecur përpara. Ne nuk mund të presim deri në vitin 2158 për barazi: koha për veprim vendimtar është tani”.

Raporti Global i Hendekut Gjinor i WEF, tashmë në vitin e 18-të të tij, është një indeks vjetor i krijuar për të matur barazinë gjinore.

Ai përcakton boshllëqet me bazë gjinore në katër fusha: pjesëmarrja ekonomike dhe mundësitë; arritjet në arsim; shëndetin dhe mbijetesën; dhe fuqizimin politik.

Pjesëmarrja politike u identifikua si një zonë me çekuilibër të madh, pavarësisht nga ndryshimet modeste në nivel federal dhe lokal.

“Me mbi 60 zgjedhje kombëtare në vitin 2024 dhe me rreth gjysmën e popullsisë së botës që ka të drejtë të votojë në zgjedhjet e këtij viti, përfaqësimi politik i grave dhe hendeku i përgjithshëm gjinor mund të përmirësohet”, thuhet në raport.

Referuar një raporti të WEF, vitin e kaluar gratë mbanin rreth 27 për qind të vendeve parlamentare dhe 23 për qind të posteve ministrore, si dhe përfaqësonin më pak se 10 për qind të krerëve të shteteve në botë.

“Me mbi 60 zgjedhje kombëtare në vitin 2024 dhe me popullsinë më të madhe globale në histori të vendosur për të votuar, përfaqësimi politik i grave dhe hendeku i përgjithshëm gjinor mund të përmirësohet”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.