Një lidhje nënujore e telekomunikacionit mes Suedisë dhe Estonisë është dëmtuar

Një kabllo nënujore e telekomunikacionit midis Suedisë dhe Estonisë është dëmtuar, sipas qeverisë suedeze.

Çka shënon edhe incidentin e dytë të tillë që raportohet në rajon në një javë.

Ministri suedez i Mbrojtjes Civile, Carl-Oskar Bohlin, ka thënë se dëmtimi i kabllos duket se ka ndodhur në të njëjtën kohë kur një tubacion gazi nënujor dhe një kabllo telekomunikuese midis Finlandës dhe Estonisë u dëmtuan më 8 tetor.

“Aktualisht nuk jemi në gjendje të vlerësojmë se çfarë e ka shkaktuar këtë dëm. Nuk është një prishje totale e kabllove, por është një dëmtim i pjesshëm i kabllos”, ka thënë Bohlin.

Qeveria sakaq ka marrë informacion nga “partnerët dhe autoritetet” për dëmet në ditët e fundit, sipas Bohlin.

Dëmtimi i një tubacioni gazi në Gjirin e Finlandës u zbulua javën e kaluar, gjë që më pas çoi në zbulimin e dëmtimit të një kablloje të dhënash.

Një hetim paraprak për sabotim është duke u zhvilluar.

Helsinki ka thënë se nuk mund të përjashtojë mundësinë që një “aktor shtetëror” të ishte pas zbulimit të javës së kaluar në mes të asaj që shërbimi i tij i inteligjencës së sigurisë kombëtare i quajti marrëdhëniet “të përkeqësuara ndjeshëm” me Rusinë.

Por Vladimir Putin ka hedhur poshtë çdo sugjerim se Rusia qëndron pas dëmit.

Incidenti i fundit nuk ishte në ujërat territoriale suedeze apo brenda zonës ekonomike, por ministri i Mbrojtjes, Pål Jonson, ka thënë se situata e sigurisë në Suedi është përkeqësuar.

Sipas tij, vigjilenca e shtuar ka qenë në vend që nga shpërthimet e Nord Stream vitin e kaluar.

“Ne nuk e dimë se çfarë e shkaktoi këtë dëm, por nuk mund të përjashtojmë asgjë”, ka theksuar Jonson.

Adm Ewa Skoog Haslum, shefja e marinës suedeze, ka sqaruar se dinamika në ujërat suedeze është në kohë të reja.

“Është një situatë shumë intensive që kemi në det. Ka shumë lëvizje në sipërfaqe dhe gjithçka që ndodh nën sipërfaqe është e mohueshme”, ka thënë ajo.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.