Nis greva e SBASHK-ut, nuk do të përfundojë pa u përmbushur kërkesat

Sindikata e Bashkuar, Arsimit dhe Shkencës dhe Bashkimi i Sindikatave të Pavarura të Kosovës në ditën e parë të Grevës së Përgjithshme kanë vizituar çerdhen “Yllkat”.

Me këtë rast Jasharaj, tha se greva nuk do të përfundoj pa u përmbushur të gjitha kërkesat e tyre.

“Kemi pasur premtime, por Qeveria nuk i ka përmbushur. Jemi duke kërkuar shumë minimale. Po ta kishim ligjin e pagave, këto çështje nuk do ta përmendnin. Qytetarët mllefin nuk duhet orientuar nga ne. Qeveria nuk ka mbajtur asnjë takim me neve”, ka thënë ai.

Sipas tij, ekzekutivi ka kapacitet për t’i ndarë nga 100 euro për mësimdhënësit.

“Kërkesa për 100 euro ka rrjedhë sa i përket ligjit të pagave. Nuk kemi shkuar në shuma të tjera. Sepse janë 86 mijë të punësuar në sektorin publik. Do të ishte shenjë simbolike në këtë kohë krizë. Jemi të bindur se shteti do ti ndante 100 euro sepse ka buxhet. Edhe këtij 100 euro shteti i ka thënë jo dhe po mundohet të injorojë kërkesat e sindikatave”.

Më 22 gusht, ministrja e Arsimit, Shkencës, Teknologjisë dhe Inovacionit (MASHTI), Arbërie Nagavci, është shprehur se kanë bërë të gjitha përgatitjet e duhura për fillimin e vitit të ri shkollor.

Paralajmërimit e Sindikatës së Bashkuar të Arsimit, Shkencës dhe Kulturës, e para e kësaj ministrie i ka quajtur të paarsyeshme.

Përmes një shkrimi në rrjetin social ‘Facebook’, ajo ka thënë se MASHTI ka punuar në përmirësimin e arsimit në shumë drejtime.

“Angazhimi ynë është shumë dimensional, në përmirësimin e infrastrukturës në shkolla, avancimin e infrastrukturës ligjore, që të kemi staf të kualifikuar, tekste cilësore, kabinete e laboratore, në mënyrë që t’i përmirësojmë rezultatet në arsim”, ka shkruar Nagavci.

Sa i përket pagave ajo i ka quajtur “të dinjitetshme për mësimdhënësit tanë”.

Bashkimi i Sindikatave të Pavarura të Kosovës, ka lajmëruar se nga 25 gushti i këtij viti do të ketë grevë të përgjithshme të të punësuarve për shkak të mosrealizimit të kërkesave të tyre nga ana e Qeverisë së Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.