“Nëse Gareth Bale është në formë shumë të mirë, dyshoj të ekzistojë një trajner në botë që nuk do ta nxirrte në fushë”, këto ishin fjalët e Jose Mourinho-s pas fitores së thellë të Tottenham kundër Burnley në Premier Ligë me rezultatin 4-0.
Mbrëmjen e djeshme, uellsiani shënoi dy gola (minutën 2′ dhe 55′) dhe një asist. Pas të parit, festoi Harry Kane në të 15’-ën dhe Lucas Moura në të 31’-ën.
Huazimi nga Real Madrid më 19 shtator të 2020-ës, nuk premtoi shumë; për të mos thënë fare. Mirëpo, paraqitja e 31-vjeçarit po dëshmon të kundërtën, në mos diçka më tepër se aq.
Mourinho nuk e aktivizoi thuajse fare gjatë pjesës së parë të sezonit. Tashmë Mou artikulon faktin se Bale nuk është më “i thatë”, por “është më mirë se kurrë”.
“Ndonjëherë njerëzve u pëlqen të shkruajnë histori dhe tjetër herë, disa prej tyre u pëlqen të imagjinojnë histori, të cilat duhet t’i shkruajnë, ndërsa disa herë, në mos shpeshherë, njerëzve u pëlqen të shkruajnë gjëra që s’janë aspak të vërteta – Ai është më mirë se kurrë teksa flasim. Dyshoj të ekzistojë një trajner në botë i cili nuk do ta aktivizonte. Nuk ka trajner t’i thotë jo Bale-it”, u shpreh Mou.
Pasi hapi lojën për Hotspurs-at, Bale asistoi edhe Kane për golin e tij, por ai ishte pjesë edhe e skenarit që u shkrua për golin e Moura-s.
Lehtësisht faktori kryesor i lojës apo kryelojtari kundër Burnley-t që i dhuroi Tottenham-it fitoren e dytë në shtatë takime të Premier Ligës, Bale foli për Sky Sports:
“Ishte lojë e mirë. Jam stërvitur nga pak në mënyrë që të ruaj ritmin. Po rikthehem në formën time dhe ndihem më mirë që ndihmova ekipin të fitojë”, tha Bale.
Sa u përket kritikave, Bale u përgjigj:
“Jam i vetëdijshëm që prania dhe forma ime ka munguar, por unë vazhdoj dhe do të vijoj të punoj me ngulm. Askush nuk u fshihet dot kritikave, por kam eksperiencë të mjaftueshme për t’i pranuar me modesti, të ul kokën e të mos them budallallëqe”.
Qëndrimi dhe durimi i Mourinho-s ndaj Bale-it po vërteton edhe më largpamësinë e “The special one” (I veçanti – nofka e Mourinho-s).
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
