Me sukses lëshimi i raketës balistike nga Koreja e Veriut

Koreja e Veriut ka testuar me sukses një “lloj të ri” të raketës balistike të lëshuar nga nëndetëset të martën e 19 tetorit në Brigjet e Japonisë.

Qeveria zbuloi raketën në janar, duke e përshkruar si “arma më e fuqishme në botë”, ndërsa është gjithmonë në kërkim të armëve gjithnjë e më të përmirësuara.

Pajisja ka “teknologji të avancuara drejtuese të kontrollit”, tha Agjencia Qendrore Koreane e lajmeve të mërkurën.

Ajo u lëshua nga e njëjta anije që përdori Koreja e Veriut në testet e para të raketave balistike të lëshuara nga nëndetëset (SLBM) pesë vjet më parë.

Prandaj janë hedhur dyshime mbi pretendimet e Phenianit në vitin 2015, se kishte lëshuar një raketë nëndetëse.

Në raportin e së mërkurës së 20 tetorit nuk u përmend udhëheqësi Kim Jong-un, çka do të thotë  se ai nuk ishte i pranishëm në ngjarje.

Fotografitë e botuara në gazetën “Rodong Sinmun” treguan se raketa bardhezi doli nga ujërat e ndjekur një kolonë zjarri dhe tymi.

Të shqetësuar, diplomatët ndërkombëtarë, thanë se Këshilli i Sigurisë i OKB-së do të mbajë një takim urgjent me dyer të mbyllura të mërkurën për Korenë e Veriut.

Përdorimi i së njëjtës nëndetëse, “8.24 Yongung”, do të thotë se Koreja e Veriut mund të ketë bërë përparim në aftësitë e lëshimit të raketave, duke qenë se më parë ishte thënë se anija eksperimentale “duket e aftë të gjuajë një raketë të vetme balistike”.

Kjo, sipas një analize të vitit 2018, nga Qendra Amerikane e Iniciativës së Kërcënimit Bërthamor.

Pentagoni dhe analistët thonë se testi i mëparshëm SLBM i Veriut, në vitin 2019, ka të ngjarë të ishte shkarkuar nga një platformë e zhytur.

Koreja e Veriut ka kryer një mori testesh raketash javët e fundit, duke përfshirë armët hipersonike dhe ato me rreze të gjatë.

Testi i 19 tetorit, i kryer pranë Sinpo, vendi i një kantieri të madh detar, erdhi ndërsa të dy Koretë ndërtuan aftësitë e tyre armatike në atë që mund të shndёrrohet nё një garë armatimi në gadishull, me dialogun Washington-Phenian në ndalesë.

Pse ‘aftësia për nëndetëse’ është domethënëse?

Në tetor 2019, Koreja e Veriut testoi një raketë balistike të lëshuar nga nëndetëse, duke gjuajtur një Pukguksong-3 nga një platformë nënujore.

Në atë kohë, agjencia shtetërore e lajmeve “KCNA” tha se ishte qëlluar në një kënd të lartë për të minimizuar “kërcënimin e jashtëm”.

Sidoqoftë, nëse raketa do të ishte lëshuar në një trajektore standarde, në vend të asaj vertikale, mund të kishte udhëtuar rreth 1 mijë e 900 km.

Kjo do t’i kishte vënë të gjithë, Korenë e Jugut dhe Japoninë brenda rrezes.

Nisja nga një nëndetëse gjithashtu mund t’i bëjë më të vështira zbulimin e raketave dhe t’i lejojë ata të afrohen me objektivat e tjerë.

Nisja e fundit vjen ndërsa Koreja e Jugut zhvillon armët e veta, në atë që vëzhguesit thonë se është shndërruar në një garë armatimi në gadishullin Korean.

Seuli po mban atë që thuhet të jetë ekspozita më e madhe e mbrojtjes e Koresë së Jugut këtë javë. Mendohet se do të zbulojë një avion të ri luftarak si dhe armë të drejtuara si raketa. Gjithashtu pritet që së shpejti të lëshojë raketën e saj hapësinore.

Koreja e Veriut dhe ajo e Jugut teknikisht mbeten në luftë pasi Lufta e Koresë, e cila ndau gadishullin në dy vende dhe që pa SHBA -të që mbështesnin Jugun, përfundoi në 1953-shin me një armëpushim.

Udhëheqësi i Koresë së Veriut, Kim Jong-un, deklaroi javën e kaluar se ai nuk dëshiron që të shpërthejë përsëri lufta. Ai tha se vendi i tij duhej të vazhdonte zhvillimin e armëve për vetëmbrojtje kundër armiqve, gjegjësisht SHBA-të të cilat ai i akuzoi për armiqësi.

Ndërkohë, shefat e inteligjencës së Koresë së Jugut, Japonisë dhe SHBA-të po takohen në Seul për të diskutuar për Korenë e Veriut.

I dërguari amerikan në Korenë e Veriut, Sung Kim, aktualisht është duke shkuar në qytet për të diskutuar sesi të rifillojë dialogun me qeverinë, përfshirë nëse duhet të ketë një deklaratë zyrtare të përfundimit të Luftës Koreane.

Në 24 orët e fundit, ai ka përsëritur qëndrimin e administratës së Presidentit amerikan Joe Biden se është e hapur për takim me Korenë e Veriut pa kushte.

Bisedimet e mëparshme midis Shteteve të Bashkuara dhe Koresë së Veriut u ndërprenë për shkak të mosmarrëveshjeve themelore mbi denuklearizimin.

SHBA-të dëshirojnë që Koreja e Veriut të heqë dorë nga armët e saj bërthamore para se të lehtësohen sanksionet, por deri më tani ata kanë refuzuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.