Largimi i stikersave nga targat, Guerot: Shembull i mirë për zbatimin e marrëveshjeve të tjera

Ambasadori i Francës në Kosovë, Olivier Guerot, po e konsideron si një shembull të mirë për t’u ndjekur edhe në zbatimin e marrëveshjeve të tjera në kuadër të dialogut vendimet e Kosovës dhe Serbisë për t’i larguar në mënyrë reciproke letrat ngjitëse nga targat e veturave.

Qeveria e Kosovës, të enjten, vendosi për largimin e regjimit të letrave ngjitësve/stikersave nga veturat me targa të Serbisë që hyjnë në territorin kosovar, pasi Qeveria e Serbisë lejoi qarkullimin e targave të Republikës së Kosovës (RKS) në territorin serb.

“Nuk ka më nevojë për stikera në targat e automjeteve nga Kosova e Serbia. Një mënyrë e mirë për të nisur vitin, duke ua bërë jetën më të lehtë qytetarëve të të dy vendeve”, ka theksuar Guerot në platformën sociale, X.

Plus besoin d’autocollants sur les plaques d’immatriculation des véhicules kosovars et serbes.
Bonne manière de commencer l’année, en facilitant la vie des citoyens des deux pays🇽🇰🇷🇸
Un bon exemple à suivre pour la mise en œuvre des autres accords.

— Ambassadeur Olivier Guerot (@Olivier_Guerot) January 5, 2024

Ndryshe kryeministri i Kosovës, Albin Kurti, këtë të premte, përmes një postimi në platformën sociale në Facebook, ka shpjeguar se si ka ardhur deri te vendimi i Qeverisë së Kosovës për largimin e regjimit të letrave ngjitëse/stikerave nga veturat me targa të Serbisë që hyjnë në territorin kosovar.

Meqë Policia e Kosovës, sipas Kurtit, ka konstatuar se targat e Republikës së Kosovë (RKS) po qarkullojnë lirshëm e hapur nëpër territorin e Serbisë nga 1 janari 2024, atëherë Qeveria e Kosovës, në shpjegimin e Kurtit, bazuar në parimin e reciprocitetit ka vendosur lejimin e qarkullimit të automjeteve me targa të Serbisë, pa regjimin e stikersave.

Por, sipas tij, në rast se Policia e Kosovës ndërkohë pranon raportime nga terreni për ndryshim të qasjes a sjelljes nga autoritetet e Serbisë për targat RKS, atëherë edhe Qeveria e Kosovës do të veprojë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.