Media e njohur kineze me seli në Pekin, Caixin, e njohur për gazetarin hulumtuese, ka raportuar se Grupi Suning, që ka në pronësi skuadrën italiane të Inter-it, ka arritur të marrë borxh nga shteti kinez.
Huaja e marrë kap shifrën e 3.2 miliardë juanëve, diçka më shumë se 400 milionë euro ose 500.6 milionë dollarë, për të dalë nga kriza e likuiditetit.
Suning.com tha të mërkurën se 5.59% e aksioneve të saj do të transferohen nën planin e shpëtimit të kompanisë. Këto aksione do t’i kalonin katër ndërmarrjeve shtetërore dhe do të kontrollohen nga qeveria e provincës së Jiangsusë.
Zhang Jindong-u, pronari i klubit të Inter-it, zotëron 19.7% të aksioneve totale të Suning.com. Plani i transferimit të një pjese të aksioneve është parë si mënyra më e mirë për të zgjidhur problemet e likuiditetit, të cilat filluan të përshkallëzoheshin në fund të vitit të kaluar.
Zhang-u njoftoi se aksionet do të riblihen brenda 10 muajëve, duke shtuar edhe normën e interesit prej 3.85%.
Në muajin shkurt Suning.com njoftoi shitjen e aksioneve, të gati një të katertës së kompanisë për njësitë e kontrolluara nga shteti, me vlerë 2.3 miliardë dollarë.
Ndërsa, në vitin e kaluar, Suning.com raportoi se humbjet neto ishin 4.3 miliardë juanë, humbje që u atribuohet aksionerëve.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
