Abu Obeida, zëdhënësi i krahut ushtarak të Hamasit, deklaroi se është bërë përparim drejt një marrëveshjeje të shkëmbimit të pengjeve dhe të burgosurve, por Izraeli e ka penguar atë.
Lajmi u bë i ditur nga agjencia franceze “AFP”.
“Ka pasur kontakte të ndryshme në lidhje me shkëmbimin e të burgosurve, por Izraeli nuk ka treguar seriozitet”, tha Abu Obeida.
Ai shtoi se “çmimi për lirimin e numrit të madh të të burgosurve tanë është çlirimi i të gjithë të burgosurve palestinezë nga burgjet izraelite”.
Zëdhënësi theksoi më tej se Hamasi nuk ka asnjë kundërshtim nëse të burgosurit lirohen në faza, nëse Izraeli vendos ta bëjë këtë.
Abu Obeida kritikoi ndihmën e kufizuar të ofruar për Gazën nga shtetet arabe, duke thënë: “Ne nuk presim që vendet arabe të mobilizojnë ushtritë e tyre, por ata nuk mund të mobilizojnë as autokolona ndihmash”, duke shtuar: “Ju jeni aq të dobët dhe të nënshtruar sa mundeni. Madje, as të merrni ndihma humanitare në Gaza”.
Ai gjithashtu pohoi se Hamasi nuk ka frikë nga kërcënimet e Izraelit për një pushtim tokësor, duke thënë: “Ne nuk jemi të shqetësuar për kërcënimet e Izraelit në lidhje me një inkursion tokësor dhe ne jemi të përgatitur dhe i themi armikut se po e presim atë”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
