Edhe në vendin tonë – pas alarmit të Organizatës Botërore të Shëndetësisë (OBSH) për përhapjen e fruthit – janë konfirmuar rastet e para.
Kështu, Instituti i Shëndetit Publik (ISHP) ka konfirmuar 11 raste me fruth.
Gjashtë prej këtyre rasteve kanë lidhje familjare dhe janë të pa vaksinuar. Ndërkohë, të infektuarit janë fëmijë të moshës nga 1 deri në 9 vjeç.
Sakaq, rastet në fjalë janë të konfirmuara në qytetin e Tiranës dhe në Durrës.
Referuar ISHP-së, vaksinimi ndaj fruthit ka pësuar rënie të ndjeshme që pas pandemisë së coronavirus-it.
Vetëm në Tiranë, vitet e fundit, llogariten rreth 13 mijë fëmijë të moshës 0-5 vjeç të pa vaksinuar.
Në një raport zyrtar të publikuar nga ISHP, që kryhet çdo 10 vjet, raportohet se mbulimi me vaksinën kundër fruthit për moshat 12-13 muaj ishte 75% në raport me 94 % që ishte regjistruar në periudhën vjetore 2004-2008.
Sipas të dhënave zyrtare të ISHP, rënia më e madhe u vu re gjatë tre viteve të pandemisë e sidomos në vitin 2022 ku u vu re një rënie drastike e mbulimit me vaksina, kryesisht në qytetet e mëdha përfshi Tiranën.
Sipas ISHP, po vihet re gjithnjë e më shpesh se prindërit kanë tendencë ta shtyjnë vaksinën dhe të aplikojnë dozën e parë të kësaj vaksine te fëmijët mbi 15 muaj deri ne 20-24 muajsh.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
