Kohë jo të lehta për Pavel Durov, biseda sekrete e terroristëve taxhik në Telegram

Këto nuk janë kohë të lehta për Pavel Durov, i cili është bërë një figurë nën vëzhgimin e Moskës.

Pas sulmit në Crocus City Hall, Kremlini e përcaktoi Telegram-in si “një mjet në duart e terroristëve”.

Jo mirë, për Durov.

Ishte zëdhënësi i Kremlinit, Dmitry Peskov, i cili i tha atij pa shumë perifrazime në një intervistë për kanalin Shot në Telegram: “Prisnim më shumë vëmendje nga Pavel Durov. Sepse ky burim unik dhe teknologjikisht fenomenal, i cili është rritur para syve të brezit tonë, po bëhet gjithnjë e më shumë një mjet në duart e terroristëve – po përdoret për qëllime terroriste”.

Më pas, duke kuptuar tingullin kërcënues të fjalëve të tij, ai gjithashtu shpjegoi se jo, “Kremlini aktualisht nuk ka ndërmend të bllokojë Telegram-in në territorin rus”.

Por mesazhi duhet të ketë mbërritur te Durov. Dhe nuk ishin fjalë të rastësishme.

Historia e masakrës në Crocus City Hall është – gjithashtu – një histori Telegram-i në sezonin e ri të luftës pa kufij.

Sipas agjencisë shtetërore ruse Ria Novosti, autorët e sulmit u rekrutuan përmes kanalit Telegram të celulës Taxhik të Shtetit Islamik: kanali “Sadoi Khorasan” i përkiste krahut taxhik të Shtetit Islamik, i kontrolluar nga celula afgane e Shtetit Islamik “Vilayat Khorasan”.

Kolektivi i pavarur rus “Agentstvo” gjeti një bisedë me atë emër me 86 pjesëmarrës, i cili regjistroi 42 dhe 27 mesazhe më 28 dhe 29 shkurt.

Një lidhje për atë bisedë u shfaq në dy kanale Telegram me 1 mijë e 500 dhe 2 mijë abonentë, dhe mesazhi thoshte se “mësimi i monoteizmit dhe xhihadit ka filluar”.

Është e qartë se tani gjithçka është anuluar.

Një nga katër anëtarët e komandos, Shamsidin Fariduni, në “marrjen në pyetje” nga forcat ruse të sigurisë tha se njerëz “pa emër, pa mbiemër” e kishin rekrutuar, duke i ofruar para.

Dhe pasi ata “dëgjuan mësimet e predikuesit” në Telegram, më pas asistenti filloi t’i shkruante.

Duma propozoi dje futjen e filtrave më të rëndë në Telegram.

Anton Gorelkin, anëtar i Komitetit të Duma-s për Politikat e Informacionit, Teknologjitë e Informacionit dhe Komunikimet, gjithashtu drejtoi gishtin nga Durov.

Megjithatë, jo më shumë se dy javë më parë, në një intervistë të rrallë me Financial Times, Durov shpjegoi se ai ishte kundër moderimit të ngurtë të përmbajtjes: mund të përdoren “mekanizma të lidhur me inteligjencën artificiale”, por duke mbajtur një konkurrencë te idetë.

“Për sa kohë që njerëzit nuk i kalojnë vijat e kuqe, nuk mendoj se duhet të kontrollojmë se çfarë thonë ata. Unë besoj në konkurrencën e ideve. Unë besoj se çdo ide duhet vënë në pikëpyetje. Përndryshe rrezikojmë të rrëshqasim me shpejtësi drejt autoritarizmit”.

Për më tepër, pas prezantimit të reklamave dhe llogarive premium të paguara, Telegram po fiton vlerë me qindra miliona dollarë dhe Durov ka marrë propozime nga investitorë potencialë, të cilët vlerësojnë kompaninë aktuale në rreth 30 miliardë dollarë.

Një gjë e vogël, e cila, megjithatë, është me interes të madh strategjik për Kremlinin.

Pasi ajo që e bëri pasurinë e Telegram-it nuk është vetëm “konkurrenca e ideve”, por fakti që Kremlini me siguri i kishte tashmë mjetet në duart e tij për ta kontrolluar, madje edhe për ta përdorur.

Ka nga ata që janë të bindur se shërbimet ruse janë në gjendje të lexojnë të gjitha mesazhet: në Telegram, API ju lejon të arkivoni pothuajse të gjithë furnizimin e mesazheve, dhe më vonë, duke ditur numrin e telefonit të përdoruesit, mund të merrni të gjitha mesazhet që keni dërguar në çdo grup publik.

Por disa aktivistë të opozitës ruse e kanë denoncuar publikisht këtë, duke shpjeguar se mesazhet e tyre ishin shënuar të lexuara edhe pse nuk ishin lexuar kurrë.

Marrë nga “La Stampa”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.