Kina ofron ‘bono kompjuterike’ të inteligjencës artificiale për startup-et e pafuqishme

Kina po ndërmerr hapa për të barazuar fushën e lojës për startup-et e saj të inteligjencës artificiale.

E gjitha kjo teksa gjigantët e teknologjisë së vendit ushqehen me burime informatike të trajnimit të inteligjencës artificiale tashmë të shtrydhura nga kufizimet e çipave të SHBA-ve.

Të paktën 17 qeveri të qyteteve, duke përfshirë më të madhin Shangain, janë zotuar të ofrojnë bono kompjuterike për të subvencionuar bizneset startup të inteligjencës artificiale që përballen me rritjen e kostove të qendrës së të dhënave, ndërsa furnizimet me çipa të rëndësishëm bëhen më të pakta.

Kuponët do të vlejnë ekuivalentin midis 140 mijë dhe 280 mijë dollarëve, sipas njoftimeve zyrtare.

Ato mund të përdoren për një kohë në qendrat e të dhënave të inteligjencës artificiale për të trajnuar dhe drejtuar modele të mëdha gjuhësore të kompanive (LLM) që kuptojnë dhe gjenerojnë gjuhë natyrore dhe përmbajtje të tjera, për të kryer një gamë të gjerë detyrash.

Individët e industrisë kanë thënë se masa për të ndihmuar bizneset startup-e të inteligjencës artificiale të paguajnë për kostot e llogaritjes vjen pasi kompanitë e internetit me shërbime kompjuterike cloud anuluan kontratat, pasi kontrollet më të rrepta të SHBA-ve i shtynë ata të “marrinin GPU-të (njësitë e përpunimit grafik) për vete”.

Gjigantët e internetit Alibaba, Tencent dhe ByteDance kanë marrë masa për të kufizuar marrjen me qira të GPU-ve të Nvidia dhe kanë rezervuar shumicën e këtyre procesorëve të grumbulluar të inteligjencës artificiale për përdorim të brendshëm dhe klientë të rëndësishëm, sipas burimeve të Financial Times.

Gjatë dy viteve të fundit, administrata e presidentit amerikan Joe Biden ka shtrënguar aksesin e Kinës në çipat thelbësorë të inteligjencës artificiale, duke i bërë kompanitë të grumbullojnë para ndalimeve, të ripërdorin çipat e lojërave Nvidia ose të drejtohen në tregun e zi.

Alibaba Cloud ka shpërndarë shumicën e GPU-ve të saj të avancuara në njësitë e biznesit brenda Grupit Alibaba, kanë thënë dy punonjës të biznesit cloud.

Subvencionet do të trajtojnë vetëm një pjesë të problemit, sipas analistëve.

“Kuponi është i dobishëm për të adresuar pengesën e kostos, por nuk do të ndihmojë me mungesën e burimeve”, ka treguar Charlie Chai, një analist në grupin kërkimor 86Research.

Një person i afërt me autoritetet rregullatore ka thënë se Pekini së shpejti do të hapë një program subvencioni për grupet e inteligjencës artificiale që përdornin çipa vendas, pasi përpiqet të shtojë përpjekjet për të zhvendosur komponentët e huaj.

Po ashtu Kina ka krijuar një alternativë ndaj qendrave të të dhënave dhe shërbimeve cloud të Big Tech.

Një rrjet qendrash të dhënash shtetërore dhe platforma online është ndërtuar gjatë vitit të kaluar ku kompanitë mund të marrin me qira fuqinë kompjuterike.

Një zyrtar qeveritar që punon në ndërtimin e qendrave të të dhënave ka thënë se kuponët do të reduktonin kostot e llogaritjes së kompanive të inteligjencës artificiale me rreth 40 deri në 50 për qind nëse do të zgjidhnin qendrat e të dhënave të drejtuara nga qeveria.

Gjithashtu ka shtuar se kjo do të “zbusë presionin financiar mbi bizneset startup” në afat të shkurtër, pasi ka ende kërkesa të rrepta për aplikantët, duke përfshirë një prag minimal të të ardhurave ose të qenit pjesë e një projekti kërkimor të sponsorizuar nga qeveria.

Marrë nga “Financial Times”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.