Judith dhe Natalie Raanan kthehen në Izrael, gati për t’u ribashkuar me të afërmit

Judith dhe Natalie Raanan janë kthyer në Izrael pasi janë liruar nga terroristët e Hamasit, të cilët i kanë mbajtur peng që nga sulmi i 7 tetorit, thotë zyra e kryeministrit Benjamin Netanyahu në një deklaratë.

I dërguari i Netanyahut për pengjet, Gal Hirsch, së bashku me zyrtarë nga IDF-ja dhe organizata të tjera të sigurisë takuan çiftin në kufirin e Gazës dhe aktualisht po i çojnë në një bazë ushtarake aty pranë, ku do të ribashkohen me të afërmit e tyre që i presin atje, thotë zyra e kryeministrit izraelit.

“Qeveria e Izraelit, IDF-ja dhe e gjithë struktura e sigurisë do të vazhdojnë të operojnë me aftësitë dhe përpjekjet më të mira të tyre për të gjetur të gjithë pengjet dhe për t’i kthyer ata në shtëpi”, shtohet në deklaratë.

Zëdhënësi i IDF-së, Daniel Hagari konfirmoi se Judith Raanan dhe vajza e saj Natalie janë liruar nga Hamasi dhe janë në duart e trupave izraelite, por ai kritikoi grupin terrorist që vazhdon të mbajë rreth 200 robër të tjerë.

“Hamasi i prezantohet botës në këtë orë si ai që liron pengjet për arsye humanitare, por në realitet, ne po flasim për një grup terrorist vrasës, i cili në këtë orë mban robër foshnja, fëmijë, gra dhe të moshuar”, thotë Hagari.

Ai shton se IDF-ja po vazhdon përpjekjet e saj për të kthyer pengjet në Izrael.

Sipas tij, IDF-ja është ende duke u përgatitur për “fazat e ardhshme të luftimeve”, të cilat pritet të përfshijnë një ofensivë të madhe tokësore.

“Luftimi ka të ngjarë të zgjasë edhe shumë javë të tjera”, shton Hagari.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.