Java për Kosovën: Në Bruksel rreth krizës së dinarit serb – në Strasburg për rrugën drejt Këshillit të Europës

Në javën e tretë të muajit prill priten të zhvillohen dy procese paralele, por shumë të rëndësishme për trajektoren e vendit – një cikël i ri i negociatave midis Kosovës dhe Serbisë për çështjen e dinarit serb pritet të mbahet këtë javë në Bruksel të Belgjikës, derisa në Strasburg të Francës pritet vendimmarrja historike mbi anëtarësimin e Kosovës në Këshillin e Evropës.

Përderisa në agjendën e Bashkimit Evropian (BE) planifikohen negociata këtë javë për zgjidhjen e çështjes së dinarit serb dhe zbutjen e tensioneve ekzistuese, një ndër pikat kryesore të sesionit pranveror të Asamblesë Parlamentare të Këshillit të Evropës do të jetë debati mbi aplikacionin e Kosovës për t’u bërë pjesë e panteonit të kombeve të barabarta evropiane.

Kosova dhe Serbia nuk arritën të pajtohen për çështjen e dinarit serb as në takimin e tretë që u zhvillua më 4 prill ndërmjet ekipeve negociatore të Prishtinës dhe Beogradit, ndërsa Emisari Special i BE-së për dialogun, Mirosllav Lajçak, deklaroi se palët janë afër gjetjes së zgjidhjes së përkohshme bazuar në propozimin e bllokut evropian për zgjidhjen e nyjes.

Në takimin e fundit që kryenegociatorët e Kosovës dhe Serbisë zhvilluan nën ndërjmetësimin e Lajçakut në Bruksel mbi tensionet që u ndezën pas rregullores së Bankës Qendrore të Kosovës (BQK), nëpërmjet së cilës autoritetet kosovare synojnë të ndalojnë përdorimin e dinarit serb, palët nuk u pajtuan mbi kompromisin e propozuar për zgjidhje të krizës nga BE-ja.

Zëvendëskryeministri i Kosovës, Besnik Bislimi, njëherësh shef i ekipit negociator të palës kosovare, njoftoi pas takimit se Kosova e pranoi ofertën e Lajçakut për zgjidhje të problemit mbi dinarin serb, duke e konsideruar “propozim konstruktiv” që njëkohësisht është brenda Rregullores së BQK-së dhe në pajtim me legjislacionin e Kosovës për politikën monetare.

E përderisa u tha se pala kosovare e pranoi “propozimin konstruktiv” të Lajçakut, delegacioni serb në udhëheqjen e drejtorit të të ashtuquajturës “Zyrë për Kosovë” në Qeverinë e Serbisë, Petar Petkoviç, nuk tregoi gatishmëri që të reflektojë dhe rrjedhimisht, refuzoi ofertën e Lajçakut për kompromis të negociuar, ndërsa kërkoi “kohë shtesë” për çështjen në fjalë.

Megjithatë, për shkak se palët nuk kanë arritur marrëveshje në takimin e fundit, terreni i kërkimit të madh për “formulën e zgjidhjes” pritet të vazhdojë këtë javë, ndërsa mbetet për t’u parë nëse lista e “skenarëve të dhunës” që mund të rezultojnë për shkak çështjes së dinarit dhe tensioneve ekzistuese do të zgjerohet apo do të gjendet një zgjidhje në dialog.

Në kuadër të “betejes diplomatike” bën pjesë edhe rrugëtimi i Kosovës drejt Këshillit të Evropës. Komiteti i Asamblesë Parlamentare të Këshillit të Evropës për Barazi dhe Jo-Diskriminim pritet të diskutojë raportin për Kosovën. Gjithashtu, në Komitetin për Çështje Ligjore dhe të Drejta të Njeriut, në të njëjtën ditë, do të diskutohet për anëtarësimin e Kosovës.

Asambleja Parlamentare e Këshillit të Evropës pritet të votojë për anëtarësimin e Kosovës pasneser (16 prill). Do të duhen 2/3 e votave të deputetëve të shteteve anëtare, për t’i rekomanduar Këshillit të Ministrave – organit vendimmarrës – që ta ftojë Kosovën të bëhet anëtarja më e re. Kjo, nëse gjithçka shkon sipas planit, pritet të ndodhë në mes të muajit maj.

Komiteti për Politikë dhe Demokraci në Këshillin e Evropës, më 27 mars, miratoi raportin e raportueses për Kosovën, Dora Bakoyannis, ku rekomandohet që Kosova të anëtarësohet në këtë organizatë – pro votuan 31 përfaqësues të shteteve anëtare, katër kundër dhe një abstenoi.

Kosova aplikoi për anëtarësim në Këshill të Evropës në maj të vitit 2022, por moszbatimi i vendimit të Gjykatës Kushtetuese për Manastirin e Deçanit u kthye në pengesë që vendi i vogël ballkanik të vazhdojë rrugëtimin drejt anëtarësimit në organizatë, posaçërisht sepse të drejtat e njeriut dhe sundimi i ligjit janë dy vlerat themelore mbi të cilat bazohet Këshilli i Evropës.

Javë e rëndësishme për Kosovës në Bruksel e Strasburg – ekzistojnë arsye për të qenë optimist se kriza e dinarit do të zgjidhet, kurse demokracia e fundit evropiane që nuk është ende në Këshillin e Evropës do t’i bashkohet së shpejti organizatës më të vjetër për demoracinë dhe të drejtat e njeriut.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.