Ish-oficeri i policisë në Minneapolis, i dënuar muajin e kaluar për vrasjen e afro-amerikanit George Floyd, ka kërkuar një gjyq të ri.
Ekipi mbrojtës i Derek Chauvin ka paraqitur dokumente gjyqësore, sipas të cilave pretendohet për sjellje të pahijshme nga prokurorët dhe juristët.
Chauvin, i cili u kap në video i gjunjëzuar në qafën e Floyd-it për më shumë se nëntë minuta, u shpall fajtor për vrasje dhe vrasje pa dashje.
Avokati i tij thekson se klienti ishte privuar nga një gjykim i drejtë.
Chauvin përballet me 40 vjet burg. Ai do të dënohet muajin tjetër.
Çfarë po diskuton ekipi ligjor i Chauvin-it?
Mediat amerikane raportojnë se kërkesa për një gjykim të ri pritej dhe është një lëvizje e zakonshme pas një dënimi.
Në dokumentet e gjykatës, Eric Nelson argumenton se procesi nuk ishte i paanshëm për shkak të publicitetit paragjyqësor.
Ai shkruan se ishte “aq e përhapur dhe aq paragjykuese” para dhe gjatë gjykimit, saqë arriti në një “defekt strukturor në procedurë”.
Cila është polemika në lidhje me jurinë?
Juristët në çështjen e Chauvin-it u pyetën para gjyqit nëse ata ose njerëzit, që i njihnin mirë, kishin “marrë pjesë në protesta në lidhje me përdorimin e forcës policore ose brutalitetin e policisë”.
Jurisë 12-anëtarëshe iu desh më pak se një ditë për të deklaruar Chauvin-in fajtor pas një gjykimi shumë të ngarkuar, trejavor, në të cilin 45 dëshmitarë morën qëndrimin dhe u shfaqën disa orë filmime video.
Vetë Chauvin zgjodhi të mos dëshmonte, duke përdorur të drejtën e tij për të mos e inkriminuar veten me përgjigjet.
Çfarë ndodhi me George Floyd?
46-vjeçari bleu një paketë cigare në një dyqan në Minneapolis-in Jugor, mbrëmjen e 25 majit 2020.
Një ndihmës i dyqanit mendoi se ai përdori një kartëmonedhë të falsifikuar 20-dollarëshe dhe lajmëroi policinë, pasi Floyd refuzoi t’i kthente cigaret mbrapsht.
Oficerët mbërritën dhe e prangosën, por kur ata u përpoqën ta fusnin në makinën e policisë ai bëri rezistencë dhe nga përleshja Floyd përfundoi me fytyrë në trotuar.
Chauvin, 44 vjeç, vendosi gjurin e tij të majtë midis kokës dhe qafës së Floyd-it dhe e mbajti atë për shtatë minuta e 46 sekonda, sipas prokurorëve.
Dy oficerë të tjerë e ndihmonin, ndërsa një tjetër ndalonte përfshirjen e dëshmitarëve në skenë.
Më shumë se 20 herë, Floyd përsëriti se nuk mund të merrte frymë. Ai u shpall i pajetë një orë më vonë në spital.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com