Heqja e ndalimit të pirjes së duhanit në Zelandën e Re, ekspertët kritikojnë ashpër ndryshimin

Në Zelandën e Re, qeveria ka në plan të heqë ndalimin e pirjes së duhanit, për të financuar uljen e taksave.

Legjislacioni, i prezantuar nën qeverinë e mëparshme të udhëhequr nga Jacinda Ardern, do të ndalonte shitjen e cigareve vitin e ardhshëm për këdo që ka lindur pas vitit 2008.

Pirja e duhanit është shkaku kryesor i vdekjeve të parandalueshme në Zelandën e Re dhe politika kishte synuar të ndalonte brezat e rinj që të fitonin këtë zakon.

Ekspertët e shëndetësisë e kanë kritikuar ashpër ndryshimin e papritur.

“Ne jemi të tmerruar, ky është një hap tepër retrogradë ndaj masave shëndetësore lider në botë, absolutisht të shkëlqyera”, ka thënë Richard Edwards, studiues i kontrollit të duhanit.

“Shumica e grupeve shëndetësore në Zelandën e Re janë të tmerruar nga ajo që ka bërë qeveria dhe po u bëjnë thirrje atyre të tërhiqen”, ka shtuar ai.

Legjislacioni i miratuar vitin e kaluar ishte vlerësuar ndërkombëtarisht me modele kërkimore që mbështesin reformat kryesore.

Masat përfshinin kufizimin e numrit të shitësve të duhanit dhe uljen e nivelit të nikotinës në cigare.

Modelimi kishte sugjeruar se ligjet pa duhan mund të shpëtonin deri në 5 mijë jetë çdo vit.

Ligjet e Zelandës së Re besohet se kanë frymëzuar qeverinë e Mbretërisë së Bashkuar në shtator për të shpallur një ndalim të ngjashëm të pirjes së duhanit për të rinjtë.

Një zëdhënëse ka bërë me dije se pozicioni i kryeministrit Rishi Sunak mbeti i pandryshuar pas ndryshimit të Zelandës së Re.

Teksa është vlerësuar si një politikë e shëndetit publik, masat pa duhan tërhoqën kundërshtimin e disa grupeve të biznesit në Zelandën e Re.

Pronarët e dyqaneve kritikuan humbjen e të ardhurave – madje edhe me subvencionet e qeverisë.

Disa ligjvënës – përfshirë kryeministrin e ri Chris Luxon – argumentuan gjithashtu se një ndalim do të çonte në një treg të zi për duhanin.

Megjithatë, partia e tij Kombëtare, e cila fitoi 38 për qind të votave në zgjedhjet e 14 tetorit, nuk i kishte përmendur ligjet pa duhan gjatë fushatës zgjedhore.

Njoftimi i ministres së re të Financave Nicola Willis se qeveria do të anulonte ligjet tronditi ekspertët e shëndetësisë, të cilët besonin se politika do të ishte e paprekur.

Pavarësisht fitores në zgjedhje, Partia Kombëtare e qendrës së djathtë ka luftuar për javë të tëra në negociatat e politikave për të formuar një qeveri me dy parti të vogla.

Ligjet ende duhet të shfuqizohen në mënyrë aktive përmes parlamentit, ku qeveria ka shumicën.

Normat e pirjes së duhanit dhe sëmundjet dhe problemet shëndetësore të lidhura me to, janë më të lartat në mesin e popullsisë indigjene Maori të Zelandës së Re, për të cilët ekspertët kishin thënë se politika do të kishte ndikimin më pozitiv.

“Qeveria po fluturon përballë opinionit publik dhe padyshim përballë shumicës dërrmuese të njerëzve që punojnë në këtë fushë, profesionistëve shëndetësorë, mjekëve, infermierëve”, ka thënë Edwards.

Zelanda e Re ende synon të ulë normën e saj kombëtare të duhanpirjes në 5 për qind deri në vitin 2025, me synimin për ta eliminuar përfundimisht atë krejtësisht.

Më shumë se 80 mijë të rritur e kanë lënë duhanin vitin e kaluar, tregojnë të dhënat kombëtare.

Aktualisht, rreth 8 për qind e popullsisë së saj të rritur pi duhan.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.