Haradinaj kërkon që Qeveria të vetëreflektojë

Kryetari i Aleancës për Ardhmërinë e Kosovës, Ramush Haradinaj, ndërsa ka komentuar raportin e Departamentit Amerikan të Shtetit ku potencohet “korrupsioni serioz qeveritar”, ka kërkuar që Qeveria aktuale e udhëhequr nga kryeministri, Albin Kurti, të vetëreflektojë dhe rrjedhimisht të dorëhiqet.

Në vlerësimin e ish-kryeministrit të Kosovës, raporti i DASH-it është për vitin 2023 nuk ka arritur të evidentojë edhe plot dështime të tjera të Qeverisë aktuale, përfshirë këtu edhe “qindra kontrata njëburimore në vlerë prej qindra milionë eurosh”.

“Raporti i Departamentit Amerikan të Shtetit për Kosovën është goditja më e fuqishme që demistifikon këtë kurs të mashtrimit. Nuk besoj që ka qytetar të këtij vendi që sot nuk është i shqetësuar me gjetjet e këtij raporti në fushën e sundimit të ligjit, luftën kundër korrupsionit, lirinë e shprehjes, lirisë së mediave si dhe të drejtave të njeriut e plot fusha të tjera”.

Në Kosovë ka korrupsion serioz qeveritar thuhet në raportin e Departamentit Amerikan të Shtetit të të publikuar këtë të hënë me 22 prill.

Në përmbledhjen fillestare të raportit përmenden të gjeturat kryesore dhe aty thuhet se në Kosovë ka “probleme serioze me pavarësinë e gjyqësorit”, pastaj “kufizime serioze për lirinë e shprehjes dhe lirinë e medias, duke përfshirë dhunën ose kërcënimet me dhunë ndaj gazetarëve” dhe gjithashtu “korrupsion serioz qeveritar”.

Raporti flet edhe për “dhunë të gjerë me bazë gjinore, duke përfshirë dhunën në familje ose nga partneri intim; dhe krime që përfshijnë dhunë ose kërcënime për dhunë që synojnë pakicat etnike ose komunitetet e tjera të margjinalizuara”.

Sipas raportit Qeveria e Kosovës ka marrë hapa, por ata ishin “jokonsistent për të identifikuar, hetuar, ndjekur penalisht dhe ndëshkuar zyrtarët që mund të kenë kryer shkelje të të drejtave të njeriut”.

DASH ngre alarmin për gjyqësorin, pavarësinë e medias dhe korrupsionin në Shqipëri

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.