Hamasi thotë se liroi dy pengje amerikane, për arsye humanitare

Hamasi lëshoi të premten një deklaratë duke njoftuar se ka liruar dy shtetase amerikane – një nënë dhe vajzën e saj – “për arsye humanitare”.

Hapi vjen pas përpjekjeve të Qatar-it të ndërmarra për t’i “provuar popullit amerikan dhe botës se pretendimet e bëra nga presidenti i SHBA-ve Joe Biden dhe administrata e tij fashiste janë të rreme dhe të pabaza”, thotë një zëdhënës i Hamasit.

Channel 12 thotë se “burimet izraelite” kanë konfirmuar pretendimin e Hamasit se ka liruar një nënë dhe vajzën e saj që mbaheshin rob në Gaza.

Ato do të transferohen në Kryqin e Kuq Ndërkombëtar, i cili do t’i çojë në Egjipt dhe më pas në Izrael, thotë Channel 12.

Transferimi pritet të ndodhë së shpejti, por nuk dihet ende një afat kohor i saktë, sqaron rrjeti.

Hamasi mori të paktën 200 pengje gjatë një bastisjeje të agimit të 7 tetorit të kryer nga Rripi i Gazës mbi komunitetet dhe bazat ushtarake në Izraelin jugor.

Izraeli është kundërpërgjigjur duke goditur Gazën me sulme ajrore, duke vrarë mijëra dhe ka thënë se do të veprojë për të liruar pengjet ndërkohë që do të zhdukë Hamasin.

Në vitin 2011, Izraeli u kritikua nga disa nga qytetarët e tij për shkëmbimin e 1 mijë e 27 të burgosurve palestinezë për të fituar lirimin e një ushtari izraelit.

Izraeli ka thënë se bllokada e enklavës nuk do të ketë fund pa lirinë e pengjeve izraelitë.

Kalimi Rafah midis Egjiptit dhe Gazës pritet të hapet së shpejti për dërgimin e sasive të kufizuara të ndihmave.

Rreth 200 persona, duke përfshirë 30 adoleshentë dhe fëmijë të vegjël dhe 20 persona mbi moshën 60 vjeç, po mbahen peng në Gaza, tha të enjten transmetuesi publik izraelit Kan, duke cituar burime ushtarake.

Hamasi thotë se ka 200 pengje dhe se 50 të tjerë mbahen nga grupe të tjera të armatosura në enklavë. Ai tha se më shumë se 20 pengje janë vrarë nga sulmet ajrore izraelite, por nuk ka dhënë detaje të mëtejshme.

Izraeli thotë se pengjet u dërguan në Gaza, por vendndodhja e tyre e saktë brenda enklavës nuk dihet, duke e bërë shpëtimin e tyre më të komplikuar. Zyrtarët kanë thënë se shumë mund të mbahen në kufirin e tuneleve nën Gaza që trupat izraelite i quajnë “Metroja e Gazës”.

Hamasi publikoi të hënën një video të Mia Schem, një gruaje 21-vjeçare franko-izraelite e kapur në një festival muzike. Në video, ajo shfaqet duke u trajtuar për një dëmtim në krah nga një punonjës i paidentifikuar mjekësor.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.