Komisioni i Pavarur i Kualifikimit ka shkarkuar nga detyra gjyqtaren e Tiranës Shefkie Mataj (Demiraj).
Kjo e fundit, ka drejtuar seancën për çështjen e tragjedisë së Gërdecit.
Vendimi u mor nga anëtarët e KPK-së: Roland Ilia, Pamela Qirko dhe Valbona Sanxhaktari.
Sa i takon vendimit për çështjen e Gërdecit, gjyqtarja deklaroi të hënën para komisionit se çështja kishte qenë mjaft komplekse.
Ndryshimet, sipas saj, që kishte bërë Apeli, kishin të bënin me mënyrën e vlerësimit të rrethanave dhe në bindjen e brendshme.
Shefkie Demiraj e ka nisur karrierën në sistemin e drejtësisë në vitin 1992.
Ajo ka punuar për më shumë se një dekadë në Gjykatën e Rrethit Tropojë.
Prej vitit 2006, Demiraj e ushtronte funksionin në Gjykatën e Rrethit Gjyqësor Tiranë.
Gjatë seancës dëgjimore Demiraj dha shpjegime për burimet financiare që shërbyen në ndërtimin e një banese tre kate + papafingo në Tiranë.
Lidhur me profesionalizimin, u evidentuan gjetje për dy denoncime nga publiku.
Në njërën ngriheshin pretendime për zvarritje të procesit dhe arsyetimin e vendimit jashtë afateve.
Ndërsa në çështjen tjetër që kishte të bënte me caktimin e një mase sigurie.
Subjekti kishte shënuar se i proceduari ishte i padënuar, ndërkohë që rezultonte të kishte qenë më parë i dënuar.
Demiraj i kundërshtoi këto konstatime duke theksuar se çështja e parë nuk ishte zvarritur dhe se vendimi ishte dorëzuar në kohë në sekretarinë gjyqësore.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
