SHBA/ Gjykata e Lartë votoi për të rrëzuar ligjin e abortit Roe v. Wade

Gjykata e Lartë është e gatshme të anulojë një vendim historik që lejon abortin për gratë në të gjithë Shtetet e Bashkuara.

Anëtarët e saj kanë rënë dakord të anulojnë vendimin e vitit 1973 Roe v. Wade, i cili garantonte të drejtat e abortit në mbarë vendin, sipas një projekt-opinioni të raportuar nga “Politico”.

Drafti i opinionit – të cilin “Politico” thotë se e ka marrë nga një burim i paidentifikuar së bashku me materiale autentike – është nënshkruar nga gjyqtari konservator, Samuel Alito dhe vulosur me një mesazh që tregon se u është shpërndarë gjyqtarëve të tjerë më 10 shkurt dhe është pjesë e një çështjeje në lidhje me një ligj të Misisipit që do të ndalonte abortet pas 15 javësh të shtatzënisë.

Opinioni e quan ligjin “të gabuar” dhe thotë se Roe v. Wade dhe Planned Parenthood v. Casey – një rast i vitit 1992 që ndryshoi Roe, por mbështeti të drejtat e abortit – “duhen anashkaluar”, duke argumentuar se, Kushtetuta nuk garanton të drejtën për abort dhe shtetet individuale mund të vendosin vetë nëse do ta lejojnë procedurën.

Dokumenti nuk shënon se cilët gjyqtarë kanë nënshkruar projekt-opinionin, por një person i paidentifikuar i njohur me vendimin i tha Politico-s se të paktën katër gjyqtarë të tjerë konservatorë u rreshtuan në anën e argumentit të Alitos: gjyqtarët Amy Coney Barrett, Brett Kavanaugh, Neil Gorsuch dhe Clarence Thomas.

Sipas Politico-s, tre gjyqtarët liberalë të gjykatës do të hartojnë të paktën një mospajtim dhe statusi i kryetarit të drejtësisë John Roberts nuk është i qartë.

Pas publikimit të historisë së Politico, pamjet e postuara në mediat sociale treguan një turmë protestuesish që u mblodhën jashtë gjykatës supreme të hënën vonë në mbrëmje, duke tundur shenja dhe duke brohoritur “trupi im, zgjedhja ime”.

Neal Katyal, një ish-avokat i Përgjithshëm ushtrues detyre i Shteteve të Bashkuara, i cili ka argumentuar shumë çështje përpara gjykatës supreme, shkroi në Twitter se e “kam skanuar shpejt draft opinionin dhe duket legjitim. Kjo do të thotë se ka pasur një votim paraprak për të anuluar plotësisht Roe v. Wade dhe se shumica e gjykatës ra dakord”.

Demokratët dënuan vendimin e zbuluar.

Kryetarja e Dhomës së Përfaqësuesve, Nancy Pelosi dhe udhëheqësi i shumicës në Senat, Chuck Schumer thanë se anulimi i ligjit do të ishte “e neveritshme, një nga vendimet më të këqija dhe më të dëmshme në historinë moderne”.

Ndërkaq, Christie Roberts, drejtoresha ekzekutive e fushatës senatoriale demokrate, tha se “nëse ky raport është i vërtetë, ky sulm republikan ndaj aksesit të abortit, kontrollit të lindjes dhe kujdesit shëndetësor të grave ka përshkallëzuar në mënyrë dramatike rreziqet e zgjedhjeve të 2022.

Republikanët, megjithatë, ishin të gëzuar. Madison Cawthorn, një kongresmen nga Karolina e Veriut, shkroi në Twitter: “për shkak të Donald J Trump, Roe v Wade do të përmbyset”.

Senatori republikan Tom Cotton dënoi rrjedhjen e dukshme, por duartrokiti votimin, duke thënë: “Gjykata e Lartë dhe DOD duhet të arrijnë në fund të kësaj rrjedhjeje menjëherë duke përdorur çdo mjet hetimor të nevojshëm. Ndërkohë, Roe ishte jashtëzakonisht i gabuar që në fillim dhe unë lutem që Gjykata të ndjekë Kushtetutën dhe t’i lejojë shtetet të mbrojnë edhe një herë jetën e palindur”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.