Filmat e preferuar të Barack Obamës të vitit 2023: “Rustin”, “Oppenheimer”, “Past Lives” dhe më shumë

Ish-Presidenti i Shteteve të Bashkuara të Amerikës, Barack Obama ka zbuluar filmat e tij të preferuar të vitit, një traditë e përvitshme nga ai.

Tre filmat e parë në listë përfshijnë “Rustin”, “Leave the World Behind” dhe “American Symphony” – që u prodhuan nga kompania e tij Higher Ground, të cilën ai e themeloi së bashku me gruan e tij Michelle.

“Jam i njëanshëm pasi këta filma janë prodhuar nga Higher Ground, por në fakt këta janë tre nga filmat më të mirë që pashë këtë vit”, shkroi Obama.

“Rustin” shfaq aktorin Colman Domingo në rolin e aktivistit të anashkaluar të të drejtave civile Bayard Rustin.

Ndërkohë, “Leave the World Behind” paraqet yjet Ethan Hawke, Julia Roberts dhe Mahershala Ali në një histori misterioze apokalipsi, kurse “American Symphony” ndjek udhëtimin e muzikantit Jon Batiste dhe partneres së tij të jetës Suleika Jaouad ndërsa ai përpiqet të kompozojë një simfoni dhe ajo mëson se kanceri i saj është kthyer.

Në një postim në platformën X/Twitter, Obama kontekstualizoi më tej listën e tij dhe pranoi dy grevat që formësuan industrinë e argëtimit në vitin 2023.

Earlier this year, writers and actors went on strike to advocate for better working conditions and protections. It led to important changes that will transform the industry for the better.

Here are some films that reflect their hard work over the last year — including some like… pic.twitter.com/TMH9LeQgsT

— Barack Obama (@BarackObama) December 27, 2023

“Në fillim të këtij viti, shkrimtarët dhe aktorët dolën në grevë për të mbrojtur kushte më të mira pune dhe mbrojtje. Ajo çoi në ndryshime të rëndësishme që do ta transformojnë industrinë për mirë”, shkroi ai.

“Këtu janë disa filma që pasqyrojnë punën e tyre të palodhur gjatë vitit të kaluar – duke përfshirë disa si “Rustin”, “American Symphony” dhe “Leave the World Behind” që ne ishim krenarë t’i publikonim përmes @HGMedia. Cilat filma më kanë munguar?”, shtoi ai.

Përveç projekteve që ai personalisht mbështeti, Obama renditi gjithashtu “The Holdovers,” “Blackberry,” “Oppenheimer,” “American Fiction,” “Anatomy of a Fall,” “Monster,” “Past Lives,” “Air”, “Polite Society” dhe “A Thousand and One” si pjesë e filmave të tij të preferuar për vitin 2023.

Vitin e kaluar, të preferuarit e Obamës përfshinin “Top Gun: Maverick”, “Everything Everywhere All Once” dhe “Aftersun”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.