![](https://albanianpost.com/wp-content/uploads/2023/10/erdo.jpg)
Presidenti i Turqisë, Recep Tayyip Erdogan, këtë të shtune është takuar me Presidentin ultra-nacionalist të Republikës Srpska – entiteti serb në Bosnje e Hercegovinë – Millorad Dodik, si dhe me anëtaren serbe të presidencës trepalëshe (boshnjake, serbe dhe kroate) të BeH-së, Zheljka Cvijanoviç.
Dodik dhe Cvijanoviç, kanë qëndruar të shtunën në Ankara, ku kanë marrë pjesë në kongresin e katërt të jashtëzakonshëm të Partisë për Drejtësi dhe Zhvillim – e udhëhequr nga Erdogan.
Mësohet se gjatë takimit, Erdogan ka falënderuar Cvijanoviç-in dhe Dodik-un për pjesëmarrjen e tyre në kongres, dhe se të njëjtit kanë diskutuar për marrëdhëniet dypalëshe mes Turqisë dhe Bosnje e Hercegovinës dhe çështjet rajonale.
![](https://cdn.oslobodjenje.ba/images/slike/new/2023/10/07/6712454.jpg?1696683416)
Për takimin ka njoftuar edhe Dodik, përmes një postimi në platformën X, ku ka thënë se kreu i Turqisë i ka konfirmuar ardhjen e tij në Banja Luka gjatë vizitës së tij të parë në Bosnje e Hercegovinë.
“Biseduam edhe për situatën politike në BeH”, shkroi.
Ndryshe, Presidenti i Republikës Srpska, Millorad Dodik, është i sanksionuar nga Shtetet e Bashkuara të Amerikës dhe Britania e Madhe, derisa shumë zyrtarë evropianë kanë kërkuar që një gjë të tillë ta bëjë edhe BE.
Dodik së fundmi është duke kërcënuar për shkëputjen e RS nga BeH, gjë që është kundër marrëveshjes së Dejtonit (marrëveshja që i dha fund luftës në BeH, më 1995).
Këto kërcënime të presidentit autoritar të RS-së janë kundërshtuar ashpër nga vendet e perëndimit.
Gjithashtu, Dodik është një aleat i ngushtë i Presidentit të Federatës Ruse, Vladimir Putin. Bosnje e Hercegovina, së bashku me Serbinë, janë vendet e pakta në kontinentin e vjetër që nuk i kanë vënë sanksione Moskës pas agresionit në Ukrainë.
Për dallim nga Serbia, BeH nuk është në një linjë me perëndimin në këtë çështje për faktin se e ka bllokuar Republika Srpska, duke përdorur veton e tyre që e kanë në presidencën trilaterale (boshnjake, kroate dhe serbe) të BeH-së.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Basti zgjedhor i Macron e vendos demokracinë franceze në dyshim
-
Osmani mirëpret zgjedhjen e Ruttes në krye të NATO-s
-
Serwer vlerëson se bisedimet teknike mes Kosovës dhe Serbisë kanë dhënë më shumë rezultate sesa dialogu në nivel politik
-
Agalliu kërkon interpelancë me Kaçiun, për rastin e Onkologjikut