Britania kthen 26 persona të tjerë në Shqipëri

Ministria e Brendshme britanike (Home Office) thotë se 26 persona janë kthyer të enjten e 19 janarit në Shqipëri.

Lajmi u bë i ditur nga reporteri i BBC-së, Simon Jones.

Sipas të dhënave të gazetarit, 20 prej tyre ishin shtetas me kundravajtje ligjore, ndërsa dy prej tyre kishin mbërritur në Britaninë e Madhe me varka të vogla.

Deri më tani, deportimet e “Home Office” në Tiranë përfshinin ose të ndaluar që kanë mbaruar dënimet në Mbretërinë e Bashkuar ose njerëz që ndodheshin në Britani ilegalisht, shpesh pasi kalonin Kanalin me varka të vogla.

Një burim i qeverisë shqiptare deklaroi për gazetën britanike “Daily Mail” se bisedimet intensive mes Ministrisë së Drejtësisë së Britanisë dhe ministrit shqiptar Ulsi Manja, kanë çuar në një pakt për transferimet e para.

“Ne kemi kapacitete të kufizuara në burgjet tona. Por për të treguar se jemi gati të përmbushim detyrimet tona ndaj Britanisë së Madhe, ne kemi rënë dakord të presim 50 shqiptarë që kanë shprehur gatishmërinë për t’u kthyer”, shtoi burimi.

Mbretëria e Bashkuar dhe Shqipëria arritën një marrëveshje fillestare për të hequr shkelësit shqiptarë në korrik të vitit të kaluar.

Kuvendi i Shqipërisë ratifikoi paktin dy muaj më vonë. Por, sipas burimeve shqiptare, burokracitë penguan efektivitetin e marrëveshjes.

“Ky pakt i ri bazohet në atë marrëveshje të vitit 2021”, shtoi një burim, i cili shpjegoi se dëbimet në burg do të përcillen me shpejtësi falë një premtimi të ri nga Britania për të shkëmbyer të dhëna gjyqësore.

Ministria e Drejtësisë së Tiranës do të marrë informacion mbi vendimet e dënimit të kriminelëve shqiptarë dhe detajet e veprave për të cilat ata u shpallën fajtorë.

“Ka përshpejtuar papritur procesin”, sqaroi burimi i qeverisë shqiptare për “Daily Mail”.

Britania dhe Shqipëria firmosin marrëveshje për tre fusha kryesore bashkëpunimi

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.