Tjetër klub anglez futet në garë për transferimin e Strakoshës

Portieri i kombëtares shqiptare, Thomas Strakosha, ka hyrë në vitin e fundit të kontratës së tij me klubin e Lazio-s, e cila i skadon në verën e ardhshme.

Në rast se nuk vazhdon kontratën me klubin nga kryeqyteti italian, Strakosha do të mbetej futbollist i lirë në qershorin e ardhshëm.

Dhe, si rrjedhojë e kësaj, shumë klube janë futur në garë për të transferuar gardianin kuqezi.

Pas interesimit të Newcastle United, tani në garë është futur edhe klubi tjetër nga Premier Liga, Watford.

Siapas asaj që raporton “Calciomercato”, trajneri i Watford-it, Claudio Ranieri, u ka kërkuar drejtuesve të klubit, që të bëjnë një ofertë për portierin 26 vjeçar.

Aktualisht, skuadra e teknikut italian është në vendin e 17-të dhe i duhet të përmirësohet në janar duke filluar nga porta me nënshkrimin e Strakoshës, derisa ai kërkon ta shpëtojë skuadrën që të mos bie nga kategoria e parë e futbollit anglez.

Mbetet për t’u parë se si do të rrjedhin ngjarjet, teksa edhe Lazio do të mundohet ta bindë portierin për të rinovuar.

Strakosha ka humbur vendin e titullarit në klubin e Lazio-s, ndërsa vetëm në katër sfidat e fundit, mes Serie A dhe Ligës së Evropës, trajneri Maurizio Sarri i ka besuar gardianit të kombëtares shqiptare.

Kujtojmë që Strakosha është rritur në akademinë e klubit nga Roma, i cili paraqitjen e parë e bëri në vitin 2016.

Ai numëron në total 181 paraqitje me klubin e Lazio-s, por kohëve të fundit gjithmonë ka qenë zgjedhja e dytë e trajnerëve të tij.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.