Në moshën 82 vjeçare ka vdekur të mërkurën, senatori demokrat Harry Reid.
Reid i kishte udhëhequr demokratët për 12 vjet gjatë një periudhe të vështirë.
Bashkëshortja e tij, Landra Reid, tha se ai vdiq paqësisht e i rrethuar nga miqtë, pas një beteje katërvjeçare me kancerin në pankreas, shkruan The Guardian.
Për vdekjen e tij ka pasur shumë reagime, përfshirë atë të Presidentit Joe Biden.
“Amerikan i madh, ai i shikonte sfidat dhe besonte se ishte brenda kapacitetit të tij që të bëjë mirë, ta bëjë të drejtën. Zoti e bekoftë Harry Reid-in, mik i dashur e gjigant i historisë sonë”, shkroi mes tjerash presidenti amerikan.
Udhëheqësi i shumicës në senat, demokrati Chuck Schumer, tha se senatori Reid ishte “një nga njerëzit më mahnitës që ka takuar ndonjëherë”.
Reid la pas vetes bashkëshorten, pesë fëmijë dhe 19 nipa e mbesa.
Në maj të vitit 2018, ai kishte njoftuar se është diagnostikuar me kancer të pankreasit dhe se ishte duke iu nënshtruar trajtimit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com