Prapaskenat e takimit Blinken-Begaj, në Presidencë u fol edhe për Kosovën

Departamenti Amerikan i Shtetit ka zbardhur diskutimet mes sekretarit amerikan të Shtetit, Antony Blinken dhe Presidentit të Republikës së Shqipërisë Bajram Begaj.

Në fokus të takimit kanë qenë marrëdhëniet mes SHBA-ve dhe Shqipërisë, si edhe mbështetja që Amerika po i jep vendit tonë për reformën në drejtësi, rrugëtimin evropian dhe shumë fusha të tjera.

Blinken ka theksuar se vitet e fundit “kemi parë forcën e partneritetit në shumë fusha të ndryshme”.

“Ky është një partneritet dhe ne jemi mirënjohës për të. Ne e dimë se kaq shumë nga sfidat që ka secili prej nesh, ne mund t’i përballojmë në mënyrë më efektive së bashku, jo vetëm. Dhe kështu që ne të kemi miqësinë, partneritetin – kanë qenë 101 vjet marrëdhënie diplomatike, por vitet e fundit veçanërisht ne kemi parë forcën e partneritetit në shumë fusha të ndryshme. Pra është një kënaqësi e madhe”.

Nga ana tjetër Presidenti i Republikës së Shqipërisë, Bajram Begaj, e ka falënderuar Blinken edhe për atë çfarë SHBA po bën për Kosovën e rajonin.

“Unë jam mirënjohës për atë që po bëni për Shqipërinë, për Kosovën dhe në rajon. Dhe, natyrisht, nuk mund të lë pa përmendur se ju keni bërë kaq shumë për demokracinë shqiptare, për shtetin e së drejtës, për reformën në drejtësi, për mbrojtjen e sigurinë, dhe sigurisht për ekonominë dhe arsimin. Dhe unë mund t’ju siguroj se Shqipëria është e përkushtuar të jetë gjithmonë me ju, dhe sigurisht, ne do të jemi një kontribues për sigurinë rajonale dhe globale”.

Begaj pas takimit me Blinken: U dëshmua se partneriteti ynë strategjik është më i fortë se kurrë

Ditën e djeshme, Begaj e ka cilësuar vizitën e sekretarit amerikan si shumë të rëndësishme.

Fill pas takimit, Begaj në platformat e tij sociale shkruan se vizita dëshmon se partneriteti ynë strategjik është më i fortë se kurrë.

“Kjo vizitë është një mesazh i fortë në mbështetje të shqiptarëve, politikës tonë jashtme dhe të ardhmes së Shqipërisë në rrugën drejt integrimit në BE”.

Ai u shpreh mirënjohës për atë që Blinken po bën për Shqipërinë, Kosovën dhe rajonin.

“Jemi falënderues për atë që SHBA kanë bërë dhe ju po bëni për demokracinë shqiptare, sundimin e ligjit, veçanërisht reformën në drejtësi, mbrojtjen, sigurinë dhe sigurinë kibernetike, arsimimin dhe ekonominë përmes programeve të ndryshme mbështetëse”.

Sipas tij, Shqipëria dhe SHBA kanë qenë së bashku në mbështetje të Ukrainës si aleatë në NATO, duke kontribuar në misione në Afganistan dhe Irak.

Kreu i Shtetit thekson se Shqipëria është e përkushtuar të vazhdojë të kontribuojë së bashku me SHBA dhe NATO për sigurinë rajonale dhe globale.

“Unë e shoh këtë vizitë si një të ardhme të ndritur për Shqipërinë, partneritetin tonë strategjik që do të zgjasë për më shumë se 100 vite të tjera”.

Mbetet fakt se Shtetet e Bashkuara kanë qenë një partner dhe mik i fortë i Shqipërisë që nga vendosja e marrëdhënieve të para diplomatike në vitin 1922 dhe rivendosja në vitin 1991 pas rënies së sundimit komunist.

Të dy vendet janë të përkushtuara për të forcuar lidhjet ekonomike dhe tregtare.

Vitet e fundit, Shqipëria ka bërë hapa të mëdhenj në promovimin e tregtisë dhe hapjen e një sërë sektorësh ndaj investimeve të huaja.

Energjia, pajisjet mjekësore, farmaceutika, udhëtimi dhe turizmi, ndërtimi dhe bujqësia janë sektorët kryesorë për eksportet dhe rritjen e investimeve në SHBA.

Investimet e Shteteve të Bashkuara në Shqipëri janë trefishuar në krahasim me nivelin para pandemisë të vitit 2019, ndërkohë që tregtia e mallrave mes dy vendeve është rritur me një herë e gjysmë.

Shqipëria dhe Shtetet e Bashkuara i përkasin një sërë organizatash të njëjta ndërkombëtare, duke përfshirë Kombet e Bashkuara, Organizatën e Traktatit të Atlantikut të Veriut, Këshillin e Partneritetit Euro-Atlantik, Organizatën për Sigurinë dhe Bashkëpunimin në Evropë, Fondin Monetar Ndërkombëtar, Bankën Botërore dhe Organizatën Botërore të Tregtisë.

Shqipëria është gjithashtu një vëzhguese e Organizatës së Shteteve Amerikane.

Vendet po punojnë së bashku – në koordinim me aleatët dhe partnerët e tjerë – për të siguruar të ardhmen e Ukrainës si një komb sovran, i lirë dhe i begatë.

Shqipëria pret gjithashtu një prani të vazhdueshme ushtarake të SHBA.

Në vitin 2022, Shqipëria mirëpriti një seli të Komandës së Operacioneve Speciale në Evropë (SOCEUR), një grup pune në Ballkan dhe një Brigadë të Ndihmës së Forcave të Sigurisë së Ushtrisë së SHBA (SFAB).

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.