Sunak dhe Truss fillojnë betejën për të marrë detyrën e kryeministrit

Dy kandidatët në garën e lidershipit konservator po i parashtrojnë qëndrimet e tyre anëtarëve të partisë që do të zgjedhin pasardhësin e ish-kryeministrit britanik Boris Johnson.

Rishi Sunak dhe Liz Truss janë kandidatët kryesorë pasi kryesuan votën përfundimtare të deputetëve të mërkurën.

Sunak tha se do të prezantonte “një grup reformash po aq radikale sa ato që bëri Margaret Thatcher në vitet 1980″.

Nga ana tjetër, Truss premtoi “ulje të taksave, nxitje të ndërmarrjeve dhe politikave miqësore ndaj biznesit”.

Dy finalistët tani do të paraqesin planet e tyre në 12 takime elektorale që do të mbahen nëpër Mbretërinë e Bashkuar. E para do të zhvillohet në Leeds më 28 korrik, ndërsa e fundit në Londër më 31 gusht.

Do të ketë gjithashtu dy debate televizive, një i organizuar nga BBC më 25 korrik, tjetri i organizuar nga Sky News më 4 gusht.

Afërsisht 160 mijë anëtarët e partisë do të votojnë online ose me postë dhe rezultati përfundimtar do të shpallet në 5 shtator.

Sondazhet aktualisht sugjerojnë se Sekretarja e Jashtme Truss, e cila e ka kritikuar Sunak për rritjen e taksave gjatë kohës së tij si kancelar, është kandidatja e favorizuar e të anëtarësuarve.

Duke shkruar në Daily Mail, Truss tha se “çështja qendrore në zgjedhjet e ardhshme do të jetë ekonomia” dhe “ne kemi shkuar në drejtimin e gabuar për taksat”.

Në Daily Telegraph, Sunak shkroi se ai besonte në “punën e palodhur, familjen dhe integritetin”, duke shtuar: “Unë po kandidoj si një Thatcherit dhe do të qeveris si një Thatcherit”.

“Mënyra më e mirë për të arritur rritje ekonomike është ulja e taksave dhe burokracisë dhe rritja e investimeve dhe inovacionit të sektorit privat”, tha ai.

Ai gjithashtu shkroi se besonte se ishte kandidati më i mirë për të mundur Laburistët në zgjedhjet e ardhshme të përgjithshme.

E mërkura pa edhe paraqitjen përfundimtare të Boris Johnson, i cili tha për kohën e tij në detyrë se “tani për tani, misioni kryesisht është kryer”.

Johnson falënderoi stafin, miqtë dhe kolegët e Dhomës së Komunave përpara se të përfundonte me frazën “Hasta la vista, baby”, një citim nga filmi fantastiko-shkencor The Terminator.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.