Dy persona mbetën të vrarë dhe 11 të tjerë u plagosën pasi një sulmues kamikaz shpërtheu eksploziv pranë hyrjes së ambasadës ruse në Kabul.
Lajmi u bë i ditur nga agjencia “Reuters”, duke cituar autoritetet vendase.
Si rezultat i shpërthimit, një diplomat rus dhe një roje e ambasadës u plagosën, raporton “Meduza” duke cituar mediat shtetërore ruse.
Sipas burimeve, shpërthimi i fuqishëm është regjistruar në rrugën Darulaman rreth orës 11:00.
“Sulmuesi kamikaz u pikas para se të arrinte objektivin dhe u qëllua nga rojet e ambasadës ruse [talebane]… nuk ka ende informacion për viktima”, tha për Reuters Mawlawi Sabir, kreu i qarkut të policisë ku ndodhi sulmi.
Një burim i “RIA Novosti” raporton se në momentin e shpërthimit, një diplomat rus doli në rrugë për të thërritur emrat e aplikantëve për viza.
“Nuk ka ende informacione në dispozicion për ndonjë vdekje apo lëndim të personelit të ambasadës ruse”, shtoi Sabir.
Rusia është një nga vendet e pakta që ka mbajtur një ambasadë në Kabul pasi talebanët pushtuan vendin më shumë se një vit më parë.
Edhe pse Moska nuk e njeh zyrtarisht qeverinë e talebanëve, ata kanë qenë në bisedime me zyrtarët mbi një marrëveshje për furnizimin me benzinë dhe mallra të tjera.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
