Shtetasi amerikan mund të jetë në paraburgim në Korenë e Veriut pasi ka kaluar kufirin

Një shtetas amerikan ka kaluar kufirin ndër-korean në Korenë e Veriut pa autorizim teksa ishte në një turne dhe ka të ngjarë të jetë në paraburgim.

Kështu ka bërë me dije Komanda e Kombeve të Bashkuara që mbikëqyr zonën e çmilitarizuar në kufi.

Mësohet se personi në fjalë po merrte pjesë në një turne në Zonën e Përbashkët të Sigurisë në kufirin e zonës së demilitarizuar (DMZ) që ndan dy Koretë që nga fundi i Luftës Koreane 1950-53, ku ushtarët nga të dyja palët qëndrojnë roje.

E përditshmja e Koresë së Jugut Dong-a Ilbo, duke cituar ushtrinë, e identifikoi personin si Travis King, një ushtar i ushtrisë amerikane me gradën private të klasit të dytë.

Por gazeta më vonë e fshiu emrin.

“Një shtetas amerikan në një turne orientues JSA kaloi, pa autorizim, vijën e demarkacionit ushtarak në Republikën Popullore Demokratike të Koresë (DPRK)”, ka thënë Komanda e OKB-së (UNC) në Twitter.

“Ne besojmë se ai është aktualisht në paraburgim në Korenë e Veriut dhe po punojmë me homologët tanë për të zgjidhur këtë incident”, ka vijuar postimi, duke iu referuar Ushtrisë Popullore të Koresë së Veriut.

Ndërkaq, koloneli Isaac Taylor, zëdhënës i ushtrisë amerikane në Korenë e Jugut (USFK) dhe Komandës së OKB-së, nuk ka pranuar të konfirmonte nëse individi ishte një ushtar i ushtrisë amerikane apo një anëtar i USFK-së.

“Ne jemi ende duke bërë disa kërkime për këtë dhe gjithçka që ndodhi”, ka thënë ai.

Kalimi vjen në një kohë të ndjeshme mes tensioneve të larta në gadishullin Korean, me mbërritjen e një nëndetëse raketore balistike të armatosur me armë bërthamore të SHBA-ve në Korenë e Jugut për një vizitë të rrallë si një paralajmërim për Korenë e Veriut mbi aktivitetet e saj ushtarake.

Koreja e Veriut ka testuar raketa gjithnjë e më të fuqishme të afta për të mbajtur koka bërthamore, duke përfshirë një raketë të re balistike ndërkontinentale me karburant të ngurtë (ICBM) të lëshuar javën e kaluar.

Ndërkohë, Ministria e Mbrojtjes e Koresë së Jugut ka deklaruar se nuk kishte informacion mbi incidentin kufitar.

Këshillimi i udhëtimit i Departamentit të Shtetit i ndalon shtetasit amerikanë të hyjnë në Korenë e Veriut “për shkak të rrezikut serioz të vazhdueshëm të arrestimit dhe ndalimit afatgjatë të shtetasve amerikanë”.

Ndalimi u zbatua pasi studenti i kolegjit amerikan Otto Warmbier u arrestua nga autoritetet koreano-veriore ndërsa ishte në një turne në vend në vitin 2015.

Ai ndërroi jetë në vitin 2017, disa ditë pasi u lirua nga Koreja e Veriut dhe u kthye në SHBA në koma.

Marrë nga “Reuters”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.