Shakira zgjidh çështjen spanjolle të mashtrimit tatimor përpara se të fillojë gjyqi

Këngëtarja, Shakira ka arritur një marrëveshje me autoritetet spanjolle për të zgjidhur çështjen e saj të mashtrimit fiskal, në ditën kur u caktua të fillonte gjyqi.

Ylli kolumbian i popit do të dilte në gjykatë të hënën e 20 nëntorit, për t’u përballur me akuzat për evazion fiskal.

Autoritetet spanjolle kishin pretenduar se Shakira i detyrohej mbi 14.5 milionë euro taksa midis viteve 2012 dhe 2014, duke pretenduar se ajo kishte renditur Bahamas si vendbanimin e saj kryesor për ato vite, por në fakt kishte kaluar shumicën e kohës së saj në Spanjë.

Shakira mohoi në mënyrë të përsëritur çdo keqbërje dhe zgjodhi ta çonte çështjen në gjyq në vend që të pranonte një ofertë zgjidhjeje nga autoritetet në korrik të vitit 2022.

Sipas Associated Press, marrëveshja e Shakira përfshin një dënim të pezulluar me tre vjet dhe një gjobë prej 7 milionë eurosh.

“Gjatë gjithë karrierës sime, gjithmonë jam përpjekur të bëj atë që është e drejtë dhe të jap një shembull pozitiv për të tjerët. Kjo shpesh nënkupton marrjen e hapit shtesë në vendimet financiare të biznesit dhe personale për të siguruar këshillën më të mirë absolute, duke përfshirë kërkimin e këshillave të autoriteteve tatimore më të njohura në botë si PricewaterhouseCoopers International Limited, të cilët më këshilluan që në fillim”, pati thënë Shakira.

“Fatkeqësisht, dhe pavarësisht këtyre përpjekjeve, autoritetet tatimore në Spanjë ndoqën një çështje kundër meje, ashtu siç kanë bërë kundër shumë sportistëve profesionistë dhe individëve të tjerë të profilit të lartë, duke u harxhuar atyre energjinë, kohën dhe qetësinë e atyre njerëzve për vite me radhë”, pati shtuar ajo.

“Ndërsa isha e vendosur të mbroja pafajësinë time në një gjyq që avokatët e mi ishin të bindur se do të kishin vendosur në favorin tim, unë kam marrë vendimin që përfundimisht ta zgjidh këtë çështje me interesin më të mirë të fëmijëve të mi që nuk duan ta shohin nënën e tyre të sakrifikojë mirëqenien e saj personale në këtë luftë”, pati shtuar ajo tutje.

Shakira ka dy djem me futbollistin spanjoll Gerard Pique.

Çifti u nda në qershor të vitit 2022. Nëse do të ishte shpallur fajtore, Shakira mund të përballej me mbi tetë vjet burg, plus 24.5 milionë euro gjobë.

Këngëtarja ishte në Spanjë javën e kaluar për “Latin Grammy”, ku performoi dhe mori tre çmime, duke përfshirë këngën e vitit për “Shakira: Bzrp Music Sessions, Vol. 53”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.