Ritchie Torres: Është urgjente anëtarësimi i Kosovës në NATO

Anëtarësimi i Kosovës në NATO është çështje urgjente, ka deklaruar Kongresisti Republikan i Shteteve të Bashkuara të Amerikës, Ritchie Torres.

Ai ka shtuar se tani është koha që Kosova ta ketë vendin e saj në Aleancën Veri-atlantike.

“Si liderë të botës së lirë, SHBA duhet të mbështesë aleatët e tyre. Nuk kemi aleat më të madh në Evropën Juglindore se sa Kosovën dhe unë shqetësohem se pa anëtarësim në NATO, Kosova mund të jetë e hapur ndaj sulmeve të Serbisë dhe Rusisë. E dimë që vendet si Serbia, që paraqet kërcënim për Kosovën është e vendosur në anën e Rusisë e Kosova në anën e SHBA-ve andaj duhet të jetë pjesë e një ombrelle sigurie që NATO siguron”, tha Torres, për Kanal 10.

Ai ndër të tjera ka theksuar se Evropa e ka obligim që të pranojë Kosovën në familjen e saj.

“Evropa e ka një obligim, ta njohë pavarësinë e Kosovës sepse Rusia tashmë është kërcënimi më i madh në sigurinë e Evropës dhe Evropa nuk duhet të lejojë që të intimidohet nga Rusia për të mos e njohur Kosovën si pjesë të familjes evropiane dhe familjes perëndimore. Pushtimi rus i Ukrainës bëri që të ketë një perëndim më të unifikuar, mes SHBA-së dhe Evropës”.

“Vladimir Putin nuk kalkuloi mirë dhe nënvlerësoi unitetin e perëndimit. Po shohim një unitet që nuk e kemi parë më herët dhe kjo mund të jetë një bazë e fuqishme e zgjerimit të NATO-s për vende si Kosova”, tha Torres.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.