Presidenca e Turqisë konfirmon diskutimet me Ramën për “çështjet rajonale”

Presidenca e Turqisë ka konfirmuar mesditën e 12 korrikut se mes presidentit Erdogan dhe kryeministrit Rama është diskutuar edhe për çështjet rajonale të Ballkanit Perëndimor.

“Presidenti Erdogan u takua me kryeministrin e Shqipërisë Edi Rama në margjinat e Samitit të NATO-s në Vilnius. Gjatë takimit u diskutuan lidhjet ekonomike dhe tregtare midis Turqisë dhe Shqipërisë si dhe çështjet rajonale”, shkruhet në faqen zyrtare të Presidencës turke në Twitter.

President @RTErdogan met with Prime Minister Edi Rama of Albania on the sidelines of the NATO Summit in Vilnius.

During the meeting, economic and commercial ties between Türkiye and Albania as well as regional issues were discussed. pic.twitter.com/DofPXlJiWM

— Republic of Türkiye Directorate of Communications (@Communications) July 12, 2023

Takimi me dyer të mbyllura u zhvillua në Qendrën e Ekspozitave dhe Kongreseve Lituaneze (LITEXPO), vendi i takimit dy-ditor të NATO-s që filloi të martën.

Të dy krerët diskutuan për çështje dypalëshe dhe rajonale, ku Rama theksoi se u fol veçanërisht për Veriun e Kosovës.

Edhe pse situata e tensionuar në veriun e Kosovës nuk pritej të ishte në agjendën zyrtare të samitit dyditor në Vilnius, u diskutua rëndësia e pranisë së KFOR-it në Kosovë dhe siguria në rajonin e Ballkanit Perëndimor.

Fillimisht, një gjë të tillë e pohoi kryeministri shqiptar gjatë Forumit Publik të NATO-s në bashkëbisedimin me Rachel Rizzo, anëtare e lartë jorezidente në Këshillin Atlantik.

Kreu i Qeverisë konfirmoi se presidenti i Shteteve të Bashkuara e preku problemin e sigurisë së Ballkanit Perëndimor gjatë fjalimit të tij në Këshillin e NATO-s.

“Më ngushëllon fakti që Presidenti Biden në fjalimin e tij në Këshill e preku këtë pikë, sepse problemi i sigurisë së Ballkanit Perëndimor në ditët e sotme mund të mos jetë në të njëjtën përmasa me problemin e madh të Ukrainës, por nuk është aq i vogël sa të trajtohet si i parëndësishëm”, tha fillimisht Rama.

Sipas, kreut të Qeverisë, ajo që po ndodh është vërtet shqetësuese, posaçërisht kohët e fundit, “ku veriu i Kosovës është bërë një pikë shumë e nxehtë dhe kërcënimi i konfliktit bëhet gjithnjë e më i dukshëm”.

“Përderisa dialogu i lehtësuar nga BE-ja ka të bëjë me dy palët, Beogradin dhe Prishtinën, ka një palë të tretë që lidhet me krijimin e grupeve ekstreme në veri të Kosovës”, shtoi ai.

Kryeqeveritari u takua gjithashtu me delegacionin e Senatorëve Amerikanë në Samitin e NATO-s në Vilnius për të folur mbi situatën në Veriun e Kosovës.

“Me delegacionin e Senatorëve Amerikanë në Samitin e NATO-s, në një takim të kërkuar prej tyre nisur nga shqetësimi për situatën në Veriun e Kosovës dhe qasjen jo-konstruktive të palëve, e cila ka çuar në një përshkallëzim të rrezikshëm që duhet ndalur një orë e më parë, për t’u kthyer në tryezën e Dialogut duke finalizuar Marrëveshjen e Normalizimit”, shkruan ai.

Në këtë takim morën pjesë dhe kryediplomatja Olta Xhaçka, ministri i Mbrojtjes, Niko Peleshi, dhe drejtuesja e Shërbimit Informativ (SHISH), Vlora Hyseni.

Situata e tensionuar në veriun e Kosovës u përfshi në samitin e NATO-s

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.