Policia arreston 5 burra për trupat e gjetur në shkretëtirën e largët të Kalifornisë

Policia ka arrestuar pesë persona pasi disa trupa u gjetën të vrarë me armë zjarri në një zonë të largët të shkretëtirës Mojave të Kalifornisë jugore.

Gjashtë trupa u gjetën pasi një viktimë telefonoi 911, duke dërguar një helikopter policie në skenën e tmerrshme të krimit.

Hetuesit thanë se mosmarrëveshja duket të jetë e lidhur me prodhimin e paligjshëm të marijuanës.

Sakaq, polici bën me dije se deri më tani katër nga gjashtë viktimat janë identifikuar.

Trupat – të gjithë meshkuj – u gjetën më 23 janar në një autostradë pranë qytetit të El Mirage.

Të gjashtë viktimat mësohet se ndërruan jetë nga plagët me armë zjarri.

Katër nga viktimat kishin pësuar gjithashtu djegie të rënda.

Hetimi filloi kur operatorët e urgjencës 911 morën një telefonatë nga një prej viktimave duke raportuar se ai kishte pësuar një plagë me armë zjarri.

Një helikopter policie u nis dhe gjeti viktimat, si dhe një SUV dhe minibus të mbushur me plumba rreth orës 20:15 me orën lokale, rreth 144 km në verilindje të Los Angeles-it.

Katër prej burrave u gjetën pranë njëri-tjetrit, ndërsa një tjetër ndodhej në një automjet. Oficerët zbuluan edhe trupin e fundit pak më larg.

Pamjet ajrore të vendit të ngjarjes duket se tregojnë fuoristradën e mbushur me plumba dhe të shënuar nga xhamat e thyer dhe mbetjet e një zjarri.

Në një njoftim për shtyp, policia tha se hetuesit përcaktuan se viktimat kishin rregulluar të takoheshin në vendndodhje për një transaksion marijuanë.

Pesë burrat që janë arrestuar “arritën në vend, dhe për arsye ende nën hetim, qëlluan gjashtë viktimat”.

Tetë armë janë konfiskuar nga hetuesit dhe po testohen për të përcaktuar nëse ato janë përdorur në vrasje.

Kanabisi ka qenë i ligjshëm për të rriturit për të blerë dhe përdorur në Kaliforni që nga viti 2016, por një treg i zi mbetet për marijuanën e pataksuar.

Vitin e kaluar, policia në San Bernardino County ekzekutoi 411 urdhra kërkimi për operacione të paligjshme të marijuanës dhe sekuestroi 34 mijë kg kanabis të përpunuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.