Pandemia mbyll 3 mijë biznese në Kosovë

Rreth 3 mijë biznese në Kosovë gjatë dy viteve të fundit janë mbyllur për shkak të pandemisë COVID-19.

Bazuar në të dhënat e Ministrisë së Industrisë dhe Tregtisë gjatë vitit 2020 kanë falimentuar 1 mijë e 346 biznese, ndërsa vetëm gjatë vitit 2021 ky numër ka arritur në 1 mijë e 519 biznese, pra 173 veprimtari më shumë krahasuar me vitin 2020.

Numri më i madh i këtyre biznese që janë shuar kanë ushtruar veprimtari në sektorin e tregtisë me shumicë dhe pakicë, kështu pasuar nga hoteleria dhe akomodimi, si dhe industria përpunuese, në listën e bizneseve të mbyllura figurojnë edhe biznese në fushën e ndërtimit.

Për Kryetarin e Bordit të Odës së Afarizmit të Kosovës, Skënder Krasniqi, rezultati i dobët i performancës  ekonomike të këtyre biznese ka bërë që të rritet edhe numri i kompanive të shuara.

Megjithatë, Krasniqi shpreson që Qeveria e Kosovës do të miratojë një pako mbështetëse për bizneset.

“Ne po shpresojmë që Qeveria do të dalë edhe me një program të përkrahjes së bizneseve për dëmet që është duke i shkaktuar edhe kriza e energjisë elektrike”, ka theksuar Krasniqi, për agjencinë e lajmeve Kosova Press.

Për ish-ministrin e Tregtisë dhe Industrisë, Ismet Mulaj numri i bizneseve të falimentuara është edhe më i lartë, nga sa raportohet.

“Ky numër rreth 3 mijë biznese që janë mbyllur në këto dy vjet, një pjesë e tyre është për pasojë e pandemisë COVID-19, por edhe për pasojë e gjendjes së situatës ekonomike. Por, është edhe një numër i madh, mbi dhjetëra-mijëra biznese të cilat as nuk janë mbyllur, e as nuk e kanë filluar procesin e mbylljes së aktivitetit biznesor dhe realisht kanë mbetur pezull”, ka thënë Mulaj.

Ndryshe sipas të dhënave të Ministrisë së Industrisë në dy vitet e fundit janë regjistruar gjithsej 19 mijë e 863 biznese ku prej tyre, 9mijë e 802 gjatë vitit 2020 ndërsa 10 mijë e 61 në vitin e kaluar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.