Një kompani e quajtur Meta ka paditur Meta-n pse është emëruar Meta

Kur Facebook-u ndryshoi emrin në Meta, qarkullonin shqetësime se kompania po planifikonte të dominonte metaverse-in e sapolindur.

Por ka një palë të dëmtuar që tani po bëhet publike.

Një kompani e artit të instalacionit e quajtur Meta.is ka njoftuar se do të padisë Facebook-un për shkelje të markës tregtare.

Ajo ka pretenduar se ndryshimi i emrit ka shkelur markën e krijuar të kompanisë së vogël.

“Më 28 tetor 2021, Facebook-u vendosi emrin tonë META, të cilin e vendosëm me gjakun, djersën dhe lotët tanë për më shumë se dymbëdhjetë vjet”, thuhet në një postim në faqen e kompanisë.

“Sot, pas tetë muajsh përpjekjesh për të negociuar me mirëbesim me Facebook-un pa asnjë dobi, mbetëm pa zgjidhje tjetër veçse të ngrinim një padi kundër tyre”, ka vijuar kompania.

Pjesa më e madhe e rastit varet nga skandalet e shumta të privatësisë së Facebook-ut, të cilat Meta.is argumenton se e kanë bërë të pamundur ndarjen e emrit.

“Meta nuk mund të ofrojë më mallra dhe shërbime nën shenjën META”, thuhet në ankesën e tyre.

E gjitha sepse konsumatorët ka të ngjarë të besojnë gabimisht se mallrat dhe shërbimet e Meta-s burojnë nga Facebook-u dhe se Meta është e lidhur “me toksicitetin që është i lidhur pazgjidhshmërisht me Facebook-un”.

Meta.is mban një markë të vlefshme për emrin, por mund të jetë ende duke u përballur me një betejë të vështirë në gjykatë, duke pasur parasysh gamën e gjerë të aplikacioneve për markat tregtare që Facebook-u ka bërë që kur ndryshimi i emrit u bë zyrtar.

Ndër to edhe marka të veçanta për mesazhet, rrjetet sociale dhe shërbimet financiare.

Po ashtu ekzistojnë një sërë markash të tjera tregtare që pretendojnë emrin Meta për produkte jo teknologjike.

Marrë nga “The Verge”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.