Zoran Zaev e ka nënshkruar dokumentin e dorëheqjes nga posti i kryeministrit të Maqedonisë së Veriut.
Pas humbjes së zgjedhjeve lokale të 31 tetorit, Zaev njoftoi se do të japë dorëheqje jo vetëm nga posti drejtues në Bashkimin Social Demokratik (LSDM) në pushtet, por edhe nga posti i kryeministrit.
Më 12 dhjetor, ish-zëvendësministri i Financave Dimitar Kovaçevski u zgjodh kryetar i LSDM-së.
Ai pritet të jetë edhe mandatari i ardhshëm për të formuar një qeveri të re nga një tjetër formacion shqiptar, me “Alternativën” e Afrim Gashit.
Zaev është lider i LSDM-së që nga viti 2013
Në vitin 2015, ai filloi fushatën e tij “E vërteta për Maqedoninë”, në të cilën shpërndau informacione për bisedat telefonike të pushtetarëve të udhëhequr nga kryeministri i atëhershëm Nikola Gruevski, duke ekspozuar korrupsionin e rëndë në Maqedoni dhe ndërhyrjet në sistemin gjyqësor.
Pas zgjedhjeve të parakohshme parlamentare në dhjetor 2016, vendi ra në një krizë të rëndë pasi presidenti Gjorge Ivanov refuzoi për muaj të tërë t’i dorëzonte mandatin për formimin e kabinetit të Zoran Zaevit.
Më 27 prill, pas zgjedhjes së Talat Xhaferit, nga partia BDI e Ali Ahmetit, kryetar i Kuvendit, në Kuvend shpërthyen përleshje të përgjakshme dhe qindra simpatizues të VMRO-DPMNE-së hynë në ndërtesë.
Më shumë se 100 persona u plagosën në masakër, përfshirë Zoran Zaev, i cili kishte kokën e gjakosur.
Një vit më vonë, Gruevski u largua nga vendi dhe i shpëtoi dënimit efektiv.
Gjatë kabinetit të parë të Zoran Zaev, vendi fillimisht nënshkroi Traktatin e Miqësisë dhe Fqinjësisë së Mirë me Bullgarinë më 1 gusht 2017 dhe në qershor 2018 nënshkroi Marrëveshjen e Prespës me Greqinë, duke i dhënë fund një mosmarrëveshjeje 25-vjeçare.
Vendi e ndryshoi emrin në Republika e Maqedonisë së Veriut.
Në fillim të vitit 2019, RNM u bë anëtare e plotë e NATO-s.
Partia më e madhe opozitare, VMRO-DPMNE, pretendon se gjatë qeverisjes së Zaevit, vendi ishte i zhytur në korrupsion që përfshinte familjen e Zoran Zaev.
VMRO-DPMNE u shpreh kundër Traktatit me Bullgarinë, Marrëveshjes së Prespës dhe ndryshimit të emrit.
Kryeministri i ardhshëm i RNM-së, Dimitar Kovaçevski, i cili praktikisht u emërua nga Zaev, pritet të ndryshojë seriozisht përbërjen e kabinetit.
Është e sigurt se ministri i Shëndetësisë Venko Filipçe, ajo e Ushtrisë Radmilla Shekerinska dhe Nikolla Dimitrov, përgjegjës për integrimet evropiane do të largohen nga kabineti.
Për shkak të moszbatimit të Marrëveshjes me Bullgarinë, autoritetet në Sofje nuk e mbështetën fillimin e negociatave për anëtarësimin e RNM në BE në dhjetor 2020.
Ky qëndrim u riafirmua edhe këtë vit.
Pala bullgare i shpalli qëndrimet e saj përmes deklaratës së Kuvendit Kombëtar dhe qëndrimit kornizë në tetor-nëntor 2019.
Në marrëveshjen e koalicionit të qeverisë së re të kryesuar nga Kiril Petkov thuhet se Bullgaria ruan pozicionin e saj aktual dhe do të ndërtohet mbi marrëdhëniet dypalëshe të dy vendeve.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
