Kryeministri i Kosovës, Albin Kurti, në situatën e fundit në veri, hallin kryesor ka thënë se e ka me dez-informatat në raport me masat që i ka marrë qeveria dhe me atë se çfarë ndodhë atje.
Madje, kryeministri thotë se informimi i pasaktë i qëllimshëm, apo siç njihet dez-informimi, përbën rrezik nacional për Kosovën.
“Dez-informimi sot para qenë rrezik për siguri kombëtare, prandaj përcjellni me vëmendje komunikata nga qeveria”, deklaroi ai.
Kurti bëri të ditur se kabineti i tij dhe në përgjithësi qeveria do të intensifikojnë fushatën për informim.
“Fushata do të vazhdojë dhe nuk do të ndalet as pas 1 shtatorit”, tha ai, duke konfirmuar kështu, edhe një herë, se masat për reciprocitet të targave, por dhe të letrës së bardhë për hyrje/dalje do të vendosen në këtë datë.
Kurti ka falënderuar ministrat, pa përjashtim, për “durimin, vetëpërmbajtjen dhe pjekurinë që keni treguar”.
Ka folur edhe për barrikadat duke deklaruar se ato “nuk vijnë nga poshtë, por vendosen nga lartë”. Pra, s’janë pakënaqësi e popullit, por organizim i strukturave të dirigjuara nga Beogradi.
Duke iu drejtuar qytetarëve serbë të Kosovës, u ka thënë se “ata nuk ju përfaqësojnë juve”.
Sa për procesin e lëshimit të dokumentit shtesë për shtetasit serbë që futen në Kosovë, ka ripërsëritur se është procedurë shumë e shpejtë dhe se në momentin që fillojë aplikimi, u lëshuan “2769 dokumente për hyrje-dalje”, pa asnjë problem.
Në një pjesë të fjalimit, Kurti ka shpjeguar edhe një herë, përse masat reciproke në raport me Serbinë janë të nevojshme.
“Konvertimi i targave të automjeteve nga ato ilegale në ato RKS i shërben rendit dhe ligjit, sigurisë publike dhe lëvizjes së lirë në të gjithë republikën e Kosovës duke i kontribuar këtyre qëllimeve në të njëjtën kohë përfitohet nga lirimi i taksave doganore, taksat administrative, tarifa për targën dhe tarifa për certifikatë të regjistrimit të mjetit që në vlerë totale kapin shifrën rreth 5 mijë euro”.
“Në anën tjetër”, vazhdoj Kurti, “dokumenti për hyrje-dalje në pikat kufitare për ata që prezantojnë dokumentet e lëshuar nga autoritetet serbe nuk do ta pengojë lirinë e lëvizjes, koha e pritjes për tu pajisur me këtë dokument është mesatarisht 20 sekonda ndërkohë që për një masë të njëjtë tash e 11 vjet sa herë që udhëtojmë në Serbi duhet të presim rreth 60 minuta”.
“Kam dëgjuar për lajmin e rremë që ID-të ose dokumente serbe do të konfiskohen ne kufi në këmbim të dokumentit për hyrje-dalje kjo nuk është e vërtetë. Dokumenti për hyrje dalje është dokument shtesë i cili jepet pa pagese dhe me të cilin mund të merren edhe shërbime të tjera në institucionet tona gjatë qëndrimit në Kosovë”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com