Menaxheri Maxim Timchenko mezi e fsheh indinjatën.
Si shefi ekzekutiv i Dtek – kampionit ukrainas të energjisë elektrike – zemërimi i tij ka për qëllim Rusinë.
Por nuk do të ishte për t’u habitur nëse ai do të ndjehej i zhgënjyer me qeveritë perëndimore që po largohen nga vendi i tij pa mbrojtje të mjaftueshme kundërajrore.
“Javët e fundit, pesë nga gjashtë termocentralet tanë janë bombarduar. E gjashta është afër kufirit rus dhe sulmohet çdo ditë. Ne kemi humbur ndërmjet 70% dhe 80% të kapacitetit tonë të prodhimit të energjisë elektrike”, ka bërë me dije ai.
“Aktualisht po mundohemi ta rindërtojmë sa më shumë, plani është që të rikuperojmë pjesën më të madhe deri në dimër. Për sa kohë që nuk do të ketë sulme të tjera”.
Sipas tij, për të rindërtuar një pjesë të asaj që u shkatërrua, duhen 230 milionë dollarë mjete dhe mjete vetëm për të përballuar dimrin e ardhshëm.
“Por sigurisht që dëmet e përgjithshme kapin vlerën e disa qindra milionë dollarëve: ne ende nuk e kemi tablonë e saktë”.
Timchenko ka treguar se, për aq kohë sa merret ndihmë nga vendet evropiane, të cilat lejojnë të importohet energji, një pjesë e madhe e popullsisë është ende e mbuluar.
Por bombardimet shkaktuan gjithashtu dëme në sistemet e transmetimit dhe rajonet në kufi me Rusinë po vuajnë.
“Ata kanë probleme të mëdha, sepse është e vështirë të merret energjia elektrike atje ku duhet”.
“Është një prioritet absolut për të forcuar sistemet tona të mbrojtjes ajrore, për këtë ne kemi nevojë për mbështetje nga SHBA-të dhe Evropa. Përndryshe, gjithçka që bëjmë për të rivendosur kapacitetin e prodhimit dhe transmetimit do të shpërdorohet”.
Sipas tij, pa mbrojtje ajrore, impiantet e rindërtuara do të shkatërrohen në një cikël të vazhdueshëm.
“Në dy raste”, ka treguar ai, infrastruktura e goditur në javët e fundit pas sulmeve të mëparshme është riparuar.
“I rindërtuam dimrin e kaluar dhe tani janë shkatërruar sërish. Dallimi është se më parë rusët synonin vetëm sistemet e transmetimit, por që nga janari filluan të synonin edhe termocentralet e prodhimit”.
Timchenko ka pohuar se pa mbrojtjen amerikane rrezikohet një cikël i vazhdueshëm shkatërrimi, rindërtimi dhe shkatërrimi të ri.
“Dhe pas çdo bombardimi, ne kurrë nuk arrijmë të kthejmë një fabrikë në 100% të kapacitetit të saj të mëparshëm. Çdo sulm zvogëlon besueshmërinë e infrastrukturave, derisa në një moment të caktuar do të na duhet t’i konsiderojmë ato përfundimisht të humbura”.
Por pse rusët vazhdojnë t’i sulmojnë?
“Kjo është ajo që bëjnë terroristët: ata përpiqen të sjellin sa më shumë vuajtje që të munden, verbërisht. Nuk ka asnjë shpjegim tjetër për sjelljen terroriste. Gjykata Ndërkombëtare Penale në Hagë po i heton këto sulme si krime lufte”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
