Kurti me qëndrimin “stoik” ndaj kërkesave të Perëndimit po ndërton narracionin për zgjedhje

Pas vizitës së fundit të dërguarit të posaçëm të Shteteve të Bashkuara të Amerikës për Ballkanin Perëndimor, Gabriel Escobar në Kosovë, përfundimisht u betonua fakti se raportet ndërmjet Kosovës dhe komunitetit ndërkombëtarë, janë në pikën më të ulët të tyre.

Shkak për këtë është rregullorja e Bankës Qendrore të Kosovës e cila ndaloi përdorimin e valutës shtetërore serbe, Dinarin, për shit-blerje dhe transaksione financiare në territorin e Kosovës.

Perëndimi në veçanti, SHBA-të, po kërkojnë pezullimin e vendimit për dinarin, derisa Bashkim Evropian, SHBA-të e Qeveria e Kosovës të gjejnë një zgjidhje afatgjate, siç do të ishte transferimi elektronik i eurove përmes sistemit të Kosovës.

Me këtë nuk po pajtohet kryeministri i Kosovës, Albin Kurti, meqë në vlerësimin e tij “vendimi është i një institucioni të pavarur”, pra e BQK-së, në të cilin ai nuk dëshiron të përfshihet.

Marrë për bazë këtë premisë, Qeveria e Kosovës në dukje të parë jep përshtypjen se është i fokusuar në ndërtimin e një tregimi se po lufton presionin perëndimor për të mbrojtur sovranitetin, narracion ky i cili do t’i shërbente kryeministrit të Kosovës, Albin Kurtit në zgjedhjet e përgjithshme që pritet të mbahen.

“Nuk ka dyshim se gjatë gjithë kohës Kryeministri Kurti ka operuar me këtë skemë. Dhe kjo nuk është hera e parë”, potencon ish-deputeti i Lëvizjes Vetëvendosje, Afrim Kasolli për Albanian Post.

Ashtu sikur me çështjen e dinarit, në vlerësimin e tij, Kurti, kishte operuar në mënyrë identike edhe me temën e targave.

“Kurti po ndërton figurën se është një person që nuk nënshtrohet dhe nuk e dinë se çka është trysnia ndërkombëtare duke u tërhequr më pas, papritmas, me një dëm të madh për pozicionin politik dhe diplomatik të Kosovës”, argumenton ai.

Përveç premisës elektorale, qëndrimi “stoik” i Kurtit në raport me presionin ndërkombëtar, për Kasollin, ka motivet edhe diku tjetër – shfaqja para ndjekësve të tij, si një hero i vetmuar që po lufton vazhdimisht në mbrojtje të interesave kombëtare.

“Por, që në fund kur bënë kompromise dëshiron të mos gjykohet për këto veprime, por të mëshirohet si viktime e asaj që e ka trashëguar, që ka luftuar deri në fund, por nuk mundi t’i korrigjojë gabimet e liderëve paraprak të Kosovës”.

Megjithatë me këtë qasje, Kasolli, beson se Kurti jo që ka korrigjuar diçka, por ka shkaktuar dëme edhe më të mëdha.

“Shembull tipik i kësaj qasjeje mund të merret draft-statuti i Asociacionit të Komunave me Shumicë Serbe. Operimi me këtë qasje sidomos në këtë kohë të trazuar globale që po jetojmë vetëm sa do ta rëndojë pozicionin e Kosovës”.

Njëjtë si Kasolli, edhe Visar Ymeri, ish-deputeti i Lëvizjes Vetëvendosje, beson se kryeministri Kurti është më shumë i fokusuar në ndërtimin në publik të një profili të politikanit që nuk dorëzohet, ndërsa në tavolinë pranon të gjitha koncesionet që po i kërkohen.

Në vlerësimin e Ymerit, Kurti e sheh si të nevojshme për profilin e vetë që ta bëjë trysnin perëndimore si të dukshme, në atë mënyrë që për ta shpëtuar fytyrën e vetë.

“Deklarimet e komunitetit ndërkombëtar po ngjallin një reagim, natyrshëm, kritik ndaj qeverisë me kërkesën për ta ndryshuar qasjen, e që pastaj Kurti e përdorë për ta minimizuar kritikën ndaj koncesioneve”.

Ky pozicion i Kurtit dhe fokusimi i tij vetëm në imazhin e tij në publik, për Ymerin, me siguri që shkakton dëme të mëdha.

“Kredibiliteti i pozicionit të Kosovës në dialog po dëmtohet kështu. Një prej avantazheve që Kosova ka pasur vahzdimisht në dialog ka qenë fakti që vendet perëndimore e posaçërisht ShBA kanë pasur qëndrim të përafërt me Kosovën meqë e kanë konsideruar veten pjesëmarrës në themelimin e Kosovës shtet”.

Sjellja e Kurti, beson Ymeri, po e minon këtë pozicionim.

Çarjen e raporteve fillimisht e kishte konfirmuar ndihmës-sekretari amerikan i Shtetit për Evropën dhe Euroazinë, James O’Brien, e një qëndrim të tillë e përforcoi, Gabriel Escobar.

I deleguar i SHBA-ve për Ballkanin Perëndimor në një konferencë për media të martën – bisedë kjo e cila parapriu vizitës së tij në Kosovë – rikonfirmoi se Amerikanët kanë probleme në komunikim me kryeministrin e Kosovës, Albin Kurtin.

“Partneriteti në mes të Shteteve të Bashkuara dhe Kosovës, mes popullit amerikan dhe atij të Kosovës, nuk depërton përmes një njeriu në Kosovë, apo një partie. Mirëpo, më duhet të them që aktualisht kemi probleme në komunikim me kryeministrin”, ka pohuar ai.

Probleme në komunikim me Kurtin, sipas Escobar, nuk kanë vetëm Amerikanët, por edhe pjesa tjetër e botës perëndimore.

“Dhe jo, vetëm SHBA-ja, është problem që e ka Kosova edhe me BE-në, NATO-n, Mbretërinë e Bashkuar dhe më shumë partnerë, përfshirë Shqipërinë dhe Maqedoninë e Veriut”.

Escobar te Kurti për “shpëtimin” e marrëdhënieve të Kosovës me Perëndimin

Me një gjuhë shumë të drejtpërdrejtë që jo shumë diplomatë kanë guximin ta përdorin, O’Brien, muaj më parë kishte treguar se Kurti u kishte dhënë premtime ndryshe për çështjen e dinarit, por më pastaj ka vepruar ndryshe në terren duke vënë në pikëpyetje kështu edhe partneritetin me SHBA-të.

Për këtë arsye dora e djathtë e Madeleine Albright në një intervistë të dhënë për Zërin e Amerikës, si asnjëherë më parë artikuloi kritika të rënda në drejtim të kryeministrit të Kosovës, duke cilësuar Kurtin si të “paaftë” në qeverisje.

I pyetur se a kishte biseduar me Kurtin për shqetësimet e SHBA-ve lidhur me vendimin e BQK-së për ndalimin e dinarit në territorin e Kosovës, numri një i amerikanëve për Evropën deklaroi se “kemi pasur disa biseda në periudhën para se të shpallej vendimi dhe një shkëmbim të shkurtë më pas”.

Në pyetjen se si Kurti e kishte pritur vlerësimin e tij lidhur me këtë çështje, top-diplomati amerikan kishte potencuar se ai “ka kuptuar shqetësimet” dhe se ka premtuar “se do të punonte për to”.

Por, çudia në sytë e tij kishte ndodhur më pas kur Kurti krye në vete – ndryshe nga çfarë kishte premtuar – kishte proceduar me vendimin.

“Qartazi vendosi miratimin e vendimit. Nëse ai nuk na trajton si partner, kjo ngre pikëpyetje nëse ne mund ta konsiderojmë këtë qeveri si partnere”, vlerësoi ai.

Pjesa më problematike e kësaj interviste ishte pyetja pasuese e gazetarit dhe deklarata shqetësuese e me një mesazh të rëndë e O’Brien, i cili, si kurrë më parë, vuri në pikëpyetje marrëdhëniet në mes të Kosovës dhe SHBA-ve.

“Unë nuk bëj kërcënime të vagëta publikisht. Unë do të thoja, që nëse ne nuk trajtohemi si partner, edhe ne nuk do ta trajtojmë qeverinë e Kosovës si partnere”, tha O’Brien kur u pyet se a planifikojnë SHBA-të të veprojnë njëjtë si Bashkimi Evropian duke vendosur masa Kosovës, nëse ekzekutivi këmbëngul në qëndrimin e saj.

Kritika si asnjëherë tjetër të Amerikës për Kryeministrin e Kosovës

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.